लाप्चाबाट फर्कियो सीमास्तम्भ खोज्‍न गएको टोली- समाचार - कान्तिपुर समाचार
कान्तिपुर वेबसाईट
AdvertisementAdvertisement

लाप्चाबाट फर्कियो सीमास्तम्भ खोज्‍न गएको टोली

चिनियाँ पक्षसँग भएन वार्ता, ११ नम्बर स्तम्भ हराउँदा सीमारेखा अस्पष्ट
छपाल लामा, कलेन्द्र सेजुवाल

हुम्ला, सुर्खेत — नेपाल–चीन सीमा छुट्याउने ११ नम्बर सीमास्तम्भ खोज्न गएको नेपाली टोली चिनियाँ पक्षसँग वार्ता नगरी लाप्चाबाट फर्केको छ । हुम्लाका प्रमुख जिल्ला अधिकारी चिरञ्जीवी गिरी नेतृत्वको टोलीले लाप्चा नजिकैको ललुङजोङ क्षेत्रमा चीनले बनाएका संरचनाबारे पनि कुराकानी गर्न खोजेको थियो ।

नाम्खा गाउँपालिका–६, लिमी क्षेत्रमा पर्ने ११ नम्बर सीमास्तम्भ हराउँदा नेपाल–चीनको सीमारेखा स्पष्ट हुन सकेको छैन । लाप्चामा रहेको १२ नम्बर स्तम्भ नजिकै ललुङजोङमा चीनले संरचना निर्माण गरेपछि आइतबार नेपाली टोली बुझ्न त्यसतर्फ गएको थियो । टोलीमा नेपाली सेना, सशस्त्र, नेपाल प्रहरी र जनप्रतिनिधि सहभागी छन् । टोलीमा सहभागी नाम्खा गाउँपालिका अध्यक्ष विष्णुबहादुर लामाका अनुसार टोली आइतबार बिहान ११ बजे ललुङजोङ पुगेको थियो । त्यहाँ रहेका चिनियाँ सुरक्षाकर्मीले ताक्लाकोटबाट आफ्ना प्रतिनिधि आउँदै गरेको जानकारी दिँँदै पीपीई सेट लगाएर बस्न भनेका थिए ।

करिब डेढ घण्टा कुरेपछि चार जना चिनियाँ अधिकारी आएका थिए । ‘उनीहरूले कोरोनाको डर छ, यहाँ कुराकानी नगरौं, बरु बोर्डरलाइन (सीमारेखा) मा बसौंला भनेर माइकिङ गरे,’ उनले भने, ‘त्यसपछि हामी फर्कियौं, कुराकानी भएन ।’ उनका अनुसार चिनियाँ अधिकारीले भवन बनाएको भूभाग चीनकै भएको बताएका थिए ।

ललुङजोङमा चीनले सानाठूला गरी ११ वटा भवन बनाएको छ । लाप्चादेखि करिब ४ किलोमिटर पश्चिममा पर्छ । चिनियाँ पक्षको जवाफपछि नेपाली टोली हिल्सातर्फ लागेको थियो । हिल्सामा ८ नम्बरको स्तम्भ छ ।

सीमा अध्ययनका लागि गएको सुरक्षाकर्मीसहितको नेपाली टोली तस्बिर सौजन्य : विष्णुबहादर लामा

चीनले संरचना बनाउनुअघि ललुङजोङ क्षेत्रमा बर्खाको समयमा लिमीका बासिन्दाले चौंरी चराउन लाने गर्थे । लिमीदेखि त्यहाँ पुग्न गाडीमै करिब ४ घण्टा लाग्छ । तिब्बततिरबाट पनि चरिचरनका लागि मानिस आउँथे । करिब ४ वर्षअघि चीनले व्यापारिक प्रयोजनका लागि भनेर दुइटा घर बनाएको थियो । अहिले थप ९ वटा बनेका छन् । एउटा सानो घरमा सुरक्षाकर्मी बसेको र बाँकी प्रयोगमा नरहेको अध्यक्ष लामाले बताए । ‘खासमा त्यो ठाउँ दुवैतिरको चरिचरन क्षेत्र थियो, अहिले भवन बनेपछि लिमीका मान्छे (नेपाली) लाई त्यहाँ जान रोक लगाइएको छ,’ उनले भने, ‘हराएको पिल्लर खोजी नगर्दासम्म कुन भूभाग कताको हो भन्न सकिने अवस्था छैन ।’

हिल्सातिर गएको टोली फर्केको छैन । सहायक प्रजिअ दत्तराज हमालले छिटोमा बुधबार साँझसम्म टोली फर्किने बताए । उनले स्तम्भ हराएको र ललुङजोङमा चीनले घर बनाएको गुनासो आएपछि टोली त्यसतर्फ गएको बताए । ‘कति स्तम्भ कहाँ–कहाँ छन् भन्नेबारे टोली फर्किएपछि थाहा हुन्छ,’ उनले भने ।

नेपाल–चीन सीमाअन्तर्गत हुम्ला क्षेत्रमा मात्र १२ स्तम्भ छन् । तीमध्ये ११ नम्बर स्तम्भ हराएको वा भत्केको नेपाली अधिकारीको भनाइ छ । जिल्ला प्रशासन कार्यालयको अभिलेखमा भने हुम्ला जिल्लाको सीमारेखामा १० वटा मात्र स्तम्भ छन् ।

पहिलो पटक ०७२ सालमा हुम्लाका तत्कालीन प्रमुख जिल्ला अधिकारी कृष्णबहादुर कटुवालले सीमा बैठकमा उक्त स्तम्भबारे एजेन्डा राखेका थिए । उक्त बैठकमा दुवै पक्ष मिलेर स्तम्भ खोजी गर्ने निर्णय भएको थियो । नाम्खा–६ का वडाध्यक्ष पाल्जोर तामाङले भने, ‘बैठकमा कुरा उठ्छ, खोजी गर्ने सहमति पनि हुन्छ । बैठक सकिएपछि भने दुवै पक्षले बिर्सिन्छन्, अनि पिल्लर कहाँबाट भेटियोस् ।’

प्रकाशित : आश्विन ७, २०७७ ०६:५१
प्रतिक्रिया
पठाउनुहोस्

बेलायतमा कोरोना संक्रमण बढेपछि थप प्रतिबन्ध घोषणा

नवीन पोखरेल

लन्डन — बेलायतले कोरोना भाइरस संक्रमण बढेपछि मंगलबार थप प्रतिबन्ध घोषणा गरेको छ ।  नयाँ नियमअनुसार, आउँदो बिहीबारदेखि इंग्ल्याण्डमा पब, बार, रेस्टुरेन्ट तथा हस्पिटालिटी व्यवसाय रातप १० बजेभित्र बन्द गरी सक्नुपर्नेछ भने उनीहरुले टेबल सर्भिस मात्र गर्न पाउने छन् । उनीहरुले 'टेकवे' गर्न सक्नेछन् ।

‘रुल अफ सिक्स’ अर्थात ६ जना भन्दा बढी जमघट गरेको भेटिए वा 'फेस मास्क' नलगाउनेलाई २ सय पाउण्ड जरिवाना गरिनेछ । अब बार स्टाफ, वेटर, पसलका कामदार, सिटमा नबसेका ग्राहकहरुलाई 'फेस मास्क' अनिवार्य गरिएको छ ।

वैवाहिक समारोहमा १५ जनाभन्दा बढीको जमघटमा प्रतिबन्ध लगाइएको छ । यसअघि यो संख्या ३० जना थियो । अन्त्येष्टिमा भने विगत जस्तै ३० जना सहभागी हुन पाउने बताइएको छ ।

बुधबारदेखि टयाक्सी ड्राइभर र यात्रुले अनिवार्य मास्क लगाउनुपर्नेछ । आउँदो बिहीबार २८ देखि वयस्कहरुको इन्डोर खेल मात्र खेल्न पाइनेछ तर ६ जनाको समूहभन्दा कम सहभागिता हुनुपर्नेछ । साथै १ अक्टोबरदेखि खेल स्थलहरुमा दर्शक जान दिइने पूर्वनिर्धारीत योजना स्थगित गरिएको छ ।

सरकारले कोरोना संक्रमित पोजिटिभ भएकाहरुले 'सेल्फ आइसोलेसन' नियम पालना नगेर एक देखि १० हजार पाउण्डसम्म जरिवाना तिर्नुपर्ने नियम यही सेप्टेम्बर २८ बाट लागू गर्दैछ ।

प्रधानमन्त्री बोरिस जोन्सनले मंगलबार साँझ देशवासीका नाममा टेलिभिजन सम्बोधन गर्दै सर्वसाधारणलाई नयाँ नियम पालना गर्न अपिल गरेका छन् । दोश्रो लकडाउनको पक्षमा आफू नरहेको तर सरकारको नयाँ नियम पालना नगरे थप कडाइ गर्ने चेतावनी पनि उनले दिएका छन् । 'यो तरिका अलि कडा छ भन्ने मलाई थाहा छ, तर सम्भाव्य खतरालाई हेर्दा यो उचित पनि छ,' उनले सम्बोधनमा भने । नयाँ नियम कार्यान्वयन गर्ने सिलसिलामा प्रहरीबाहेक आवश्यक परे सेना परिचालन गरिने पनि उनले बताएका छन् । प्रधानमन्त्रीले सम्भव भएसम्म घरबाट काम गर्न पनि आग्रह गरे ।

स्कटल्याण्डमा बुधबारदेखि एक घरका मानिसले अर्को घरका मानिसलाई भेट्न रोक लगाइएको छ भने पब, बार, रेष्टुरेन्टसहित हस्पिटालिटी व्यवसायमा राति १० बजेपछि कर्फयू लगाउने घोषणा गरिएको छ । वेल्स र उत्तरी आयरल्याण्डले पनि उस्तै प्रतिबन्ध घोषणा गरेका छन् ।

यसैबीच, ब्रिटेनमा कोरोना भाइरसको खतराको स्तर बढाएर ३ बाट ४ मा लगिएको छ । ब्रिटिस सरकारका वैज्ञानिक सल्लाहकारले यदि आवश्यक सावधानी नअपनाउने हो भने आउँदो अक्टोबर मध्यसम्ममा बेलायतमा कोरोना भाइरसबाट हरेक दिन ५० हजार मानिसहरु संक्रमित हुनसक्ने चेतावनी दिएपछि खतराको स्तर बढाइएको हो ।

ब्रिटेनको चारवटै राज्यका मुख्य चिकित्सा अधिकारीहरुले एक वक्तव्यमा कोरोना भाइरस संक्रमितहरुको संख्या तीव्र गतिमा बढिरहेको जनाएका छन् । बेलायतमा मंगलबारमात्र ४ हजार ९२६ जना संक्रमित थपिएका छन् भने ३७ जनाको मृत्यु भएको छ । बेलायतमा मंगलबार साँझसम्म कोरोना संक्रमितको संख्या ४ लाख नाघेको छ ।

प्रकाशित : आश्विन ७, २०७७ ०६:१९
पूरा पढ्नुहोस्
प्रतिक्रिया
पठाउनुहोस्
×