कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १६४

बेलायतबाट फर्केको महिना दिनपछि कोरोना संक्रमण पुष्टि

रमेशकुमार पौडेल

चितवन — कोरोना भाइरस (कोभिड १९) को संक्रमण पुष्टि भएका चितवनका आमाछोरा एक महिनाअघि विदेशबाट फर्केको खुलेको छ । उनीहरुमा संक्रमणको कुनै लक्षण छैन । स्वास्थ्य अवस्था सामान्य रहेका दुवैजनालाई भरतपुरको सरकारी अस्पतालको आइसोलेसन वार्डमा राखिएको छ ।

बेलायतबाट फर्केको महिना दिनपछि कोरोना संक्रमण पुष्टि

बुधबार आरडीटी गर्दा महिलामा एन्टिबडी देखिएपछि उनीसँगै रहेका दुई छोरासहित ती महिलालाई भरतपुर अस्पतालको आइसोलेसन वार्डमा राखिएको थियो । उनीहरु पूर्वीचितवन राप्ती नगरपालिका–८ का बासिन्दा हुन् ।

भरतपुरमा रहेको कोरोना परीक्षण प्रयोगशालामा बिहीबार उनीहरु तीन जनाको पीसीआरमा स्वाब परीक्षण गर्दा दुई जनामा संक्रमण देखिएपछि थप पुष्टिका लागि शुक्रबार टेकु प्रयोगशाला पठाइएको थियो । टेकु प्रयोगशालाले पनि संक्रमण भएको पुष्टि गरेको हो । भरतपुर अस्पतालका अध्यक्ष डा.भोजराज अधिकारीका अनुसार संक्रमित दुवै जनालाई भरतपुर अस्पतालकै आइसोलेसन वार्डमा राखेर उपचार गरिने छ ।

संक्रमित आमाको उमेर ६१ वर्ष र उनको छोराको उमेर २७ वर्ष छ । उनीहरु दुईजना चैत्र ३ गते बेलायतबाट काठमाडौं उत्रेका थिए । उसै दिन अर्का छोरा पनि हङकङबाट काठमाडौं आएका थिए । उनीहरु तीनजना काठमाडौं दुई दिन बसेर चैत्र ५ गते घर चितवन आएको राप्ती नगरपालिकाकी मेयर प्रभा बरालले बताइन् । अहिले उनीहरुसँग सम्पर्कमा आएका व्यक्तिहरुको पहिचान गर्न नगरपालिका लागेको उनको भनाइ छ ।

राप्ती–८ का वडाध्यक्ष बुद्धिराज थपलियाका अनुसार उनीहरुलाई चैत्र १० गतेपछि होम क्‍वारेन्टाइनमा राखिएको थियो । ‘खासै घुमफिर गरेको अवस्था थिएन । विदेशबाट आएका हुन् भनेपछि हामीले चैत्र १० गते भेटेर होम क्‍वारेन्टाइनमा राखेका थियौं । बीचमा पनि नगरपालिकाका स्वास्थ्यकर्मी गएर थर्मल गनले ज्वरो हेर्दा पनि केही देखिएको थिएन । अस्ति बुधबार आरडीटी गर्दा आमामा शंका देखियो’ वडाध्यक्ष थपलियाले भने ।

सबै अवस्था सामान्य देखिएका कारण उनीहरु अस्पताल जान पर्लार भनेको स्थानीयले बताए । चितवनमा कोरोना भाइरसको संक्रमण देखिएको यो नै पहिलो घटना हो ।

विश्वमा कोरोना संक्रमण बढ्न थालेपछि भरतपुर अस्पतालले गएको फागुन १८ मा नै आइसोलेसन वार्ड बनाएको थियो । अहिले परीक्षणसमेत भरतपुरमै हुन्छ । चितवनमा २१४ जनाको नमुना परीक्षण भइसकेको छ । जसमा दुईजनाको मात्रै पोजिटिभ नतिजा आयो ।

यो पनि

प्रकाशित : वैशाख ५, २०७७ २०:३७
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?