कान्तिपुर मिडिया ग्रुपको सूचना- समाचार - कान्तिपुर समाचार
कान्तिपुर वेबसाईट
AdvertisementAdvertisement

कान्तिपुर मिडिया ग्रुपको सूचना

कान्तिपुर संवाददाता

काठमाडौँ — कोभिड–१९ (कोरोना) को संक्रमण फैलन नदिन सरकारले देशभरी लकडाउनको घोषणा गर्दै खाद्यान्न, औषधिबाहेक अन्य वस्तुको ओसारपसार एवं आवागमनमा रोक लगाएपछि अघिल्लो शुक्रबारदेखि कान्तिपुर पब्लिकेसन्सका समाचार सामग्री डिजिटल माध्यमबाट मात्र प्रवाह हुँदै आएका थिए ।

सरकारले लकडाउनलाई थोरै खुकुलो बनाउने निर्णय लिएसँगै हामीले शनिबारबाट कान्तिपुर र दी काठमान्डू पोस्टका छापा संस्करणको पुनः प्रकाशन थालेका छौं । कोरोना रोकथामसम्बन्धी उच्चस्तरीय समन्वय समितिको बिहीबार बसेको बैठकले अत्यावश्यक वस्तु उत्पादन गर्ने उद्योग–प्रतिष्ठानहरु खोल्न दिने निर्णय गर्नुका साथै त्यसका निम्ति आह्वानसमेत गरेको थियो । यसबीच मुलुकमा संक्रमितको संख्या धेरै नबढेको अवस्थालाई दृष्टिगत गर्दै सरकारले यस्तो आह्वान गरेको हुन सक्छ, जसलाई हामीले सकारात्मक रूपमा लिएका छौं ।


हामीले पत्रिकाको उत्पादन एवं वितरण प्रक्रियामा विशेष सजगता अपनाएका छौं । बिक्रेता, वितरक वाहक एवं अन्य सहकर्मीका निम्ति मास्क, पन्जा, स्यानिटाइजर उपलब्ध गराउनुका साथै सुरक्षा सावधानीका अन्य उपायहरु पनि अवलम्बन गरिएको छ । पत्रिका मुद्रण गर्ने क्रममा छापाखानालाई स्यानिटाइज गर्ने व्यवस्था मिलाइएको छ । यसका बाबजुद हाम्रा कुनै ग्राहकले अहिलेको असामान्य अवधिभर पत्रिका लिन चाहनुहुन्न भने हाम्रो वितरण विभागलाई सूचित गर्न सक्नुहुन्छ ।


यसको बदलामा पछि थप अवधि पत्रिका उपलब्ध गराइनेछ । यसका लागि हामीलाई सम्पर्क गर्ने टोल–फ्री नम्बर : १६६०–०१–२२२२२ (एनटीसी प्रयोगकर्ताका लागि) र ९८०१५७२२२२ (एनसेल प्रयोगकर्ताका लागि) । नियमित ग्राहकहरुले यसअघि बन्द भएको अवधिको अतिरिक्त अंक पनि प्राप्त गर्नु हुनेछ ।


अहिलेको विशेष परिस्थितिमा पनि कान्तिपुरप्रति सधैंझैं विश्वास एवं भरोसा राख्नुभएकोमा हामी सम्पूर्ण पाठक एवं शुभेच्छुकहरुप्रति आभारी छौं ।


– कान्तिपुर मिडिया ग्रुप

प्रकाशित : चैत्र २२, २०७६ ०९:१६
प्रतिक्रिया
पठाउनुहोस्

बैंकले दिन थाले ब्याज छुट

चैतमै साँवाब्याज तिर्नेलाई ब्याजमा १० प्रतिशत छुट
कान्तिपुर संवाददाता

काठमाडौँ — चैतभित्र साँवाब्याज तिर्ने ग्राहकलाई बैंक तथा वित्तीय संस्थाले १० प्रतिशत ब्याज छुट दिन थालेका छन् । राष्ट्र बैंकको निर्देशन कार्यान्वयन गर्दै बैंक तथा वित्तीय संस्थाले छुट दिन थालेका हुन् ।

कोभिड–१९ को असरबाट प्रभावित भएको भन्दै चैतमा भुक्तानी गर्नुपर्ने साँवाब्याज असारसम्म तिरे पनि हुने व्यवस्था गर्ने निर्णय सरकारले गरेको थियो । सोही आधारमा चैतसम्म साँवाब्याज भुक्तानी गर्ने ग्राहकलाई ब्याज रकमको १० प्रतिशत छुट दिन राष्ट्र बैंकले गत साता निर्देशन दिएको थियो ।

चैतभित्र साँवाब्याज भुक्तानी गर्ने ग्राहकलाई बैंकले ब्याज रकमको १० प्रतिशत छुट दिन थालेको बैंकर्स संघका अध्यक्ष भुवन दाहालले जानकारी दिए । ‘ग्राहकले अन्य महिनामा जस्तै सबै किस्ता रकम भुक्तानी गर्नुहुन्छ,’ उनले भने, ‘त्यसपछि बैंकले ब्याज रकमको १० प्रतिशत रकम ग्राहकको खातामा फिर्ता गरिदिन्छन् ।’ ग्राहकले रकम भुक्तानी गर्ने बेलामै ब्याज रकमको ९० प्रतिशत मात्र तिर्न पाइने भए पनि प्रायः बैंकको कारोबार प्रणाली (सिस्टम)ले त्यो स्वीकार नगर्ने भएकाले सुरुमा सबै रकम लिने र पछि बैंकले ब्याजको १० प्रतिशत रकम फिर्ता गरिदिने उनले बताए । ‘चैत मसान्तसम्म तिरेको किस्ताको ब्याज फिर्ता ढिलोमा वैशाख पहिलो सातासम्म हुन सक्छ,’ उनले भने ।

ग्राहकलाई ब्याजको १० प्रतिशत रकम फिर्ता दिँदा बैंकहरूको आम्दानी घट्ने भए पनि अप्ठ्यारो परिस्थितिमा सरकारले गरेको निर्णय पूर्ण रूपमा कार्यान्वयन गर्न बैंकहरू प्रतिबद्ध रहेको उनले बताए । ‘बैंकहरूले नाफा मात्र हेर्दैनन्, परेको बेला नाफा घटाएर भए पनि योगदान गर्छन्,’ उनले भने ।

चैतभित्र किस्ता तिर्ने ग्राहकलाई ब्याज छुट दिने निर्देशन पूर्ण रूपमा पालना भएको राष्ट्र बैंक नियमन विभाग प्रमुख देवकुमार ढकालले जानकारी दिए । ‘ब्याज छुट दिए, नदिएको बारे राष्ट्र बैंकले सूक्ष्म रूपमा नियमन गरिरहेको छ,’ उनले भने, ‘पछि बैंक तथा वित्तीय संस्थाले राष्ट्र बैंकलाई बुझाउने विवरणमा पनि त्यो देखिन्छ ।’
बैंक तथा वित्तीय संस्थाले सबै ग्राहकलाई (ब्याज छुटबारे जानकारी पाए/नपाएका) उक्त सुविधा दिनुपर्ने उनले बताए । संक्रमणको समयमा पनि नियमित किस्ता तिर्ने क्षमता भएका ऋणीलाई प्रोत्साहन गर्न गरिएको यो व्यवस्थाले बैंकको ऋण असुलीमा सहयोग पुग्ने उनको भनाइ छ ।

कोरोना संक्रमणको अवस्था भन्दै सरकारको निर्णयबमोजिम राष्ट्र बैंकले चैतसम्म भुक्तानी गर्नुपर्ने किस्ताको म्याद आउँदो असारसम्म थपेको छ । यो व्यवस्थाअनुसार चैतमा तिर्नुपर्ने किस्ता असारसम्म तिर्दा पनि अतिरिक्त शुल्क लाग्दैन । तर जसले किस्ता तिर्न सक्छ, उसलाई पनि केही फाइदा होस् भनेर सरकारले १० प्रतिशत ब्याज छुटको निर्णय गरेको हो ।

यसरी चैतसम्म भुक्तानी हुनुपर्ने साँवाब्याज कति छ भन्ने यकिन नभए पनि चैत मसान्त मासिक/त्रैमासिक किस्ता भुक्तानीको समय भएकाले छुट दिने १० प्रतिशत रकम धेरै हुने बैंकरहरूको दाबी छ ।

कोभिड–१९ को महामारीको कारण उत्पन्न असहज परिस्थितिबाट प्रभावित पर्यटन, उद्योग, व्यवसाय तथा वित्तीय क्षेत्रका लागि राष्ट्र बैंकले विशेष प्याकेज घोषणा गरेको थियो । ‘०७६ चैतमा असुल गर्नुपर्ने मासिक, त्रैमासिक किस्ताको भुक्तानी ०७७ असारसम्म हुने व्यवस्था मिलाउनुपर्नेछ,’ राष्ट्र बैंकको निर्देशनमा भनिएको छ । उक्त किस्ताको हकमा कुनै किसिमको थप शुल्क वा हर्जाना लिन नपाइने पनि राष्ट्र बैंकले प्रस्ट्याएको छ ।
यस्तै कर्जा असुल नभएको हकमा बैंकले उक्त कर्जालाई खराब कर्जामा राख्नु नपर्ने सुविधा पनि राष्ट्र बैंकले बैंक तथा वित्तीय संस्थालाई दिएको छ । चैत मसान्तभित्र भुक्तानी अवधि तोकिएका सम्पूर्ण चालु प्रकृतिका अल्पकालीन कर्जाको भुक्तानी अवधि ६० दिनसम्म थप गर्न सकिने पनि राष्ट्र बैंकले भनेको छ ।

‘०७६ पुसभित्र ब्याज तथा साँवा नियमित भुक्तानी गरिरहेका पर्यटन तथा यातायात क्षेत्रका ऋणीहरूले अल्पकालीन कर्जाको माग गरेमा साँवा तथा ब्याज बक्यौता रहे पनि आवश्यकताअनुसार निश्चित सीमासम्म संक्षिप्त प्रक्रिया अपनाई ५ दिनभित्र कर्जा प्रवाह गर्नुपर्नेछ,’ निर्देशनमा भनिएको छ । यस्तो सीमा स्वीकृत गर्दा ०.२५ प्रतिशतभन्दा बढी शुल्क लिन नपाइने राष्ट्र बैंकले प्रस्ट्याएको छ ।

प्रकाशित : चैत्र २२, २०७६ ०९:०९
पूरा पढ्नुहोस्
प्रतिक्रिया
पठाउनुहोस्
x
×