ताक्लाकोटबाट तत्काल उद्धार असम्भव : गृह
![ताक्लाकोटबाट तत्काल उद्धार असम्भव : गृह](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2020/third-party/taklakot-1132020021315-1000x0-1132020021959-1000x0.jpg&w=1001&h=0)
![](https://assets-cdn.ekantipur.com/uploads/source/ads/ekantipur-1-1282024082932.gif)
Highlights
- ‘मौसम प्रतिकूलता र नेपाल–चीन सीमा नाका बन्द प्रमुख कारण’
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — सरकारले चीनको ताक्लाकोटमा अलपत्र परेका १ सय ४८ नेपालीलाई तत्काल उद्धार गर्न नसकिने बताएको छ । मौसम प्रतिकूल रहेको र कोरोना भाइरस (कोभिड–१९) प्रकोपपछि नेपाल–चीन सीमा नाका बन्द भएका कारण उनीहरूलाई तत्काल उद्धार गर्न कठिन रहेको गृह मन्त्रालयले स्पष्ट पारेको हो ।
![](https://assets-cdn.ekantipur.com/uploads/source/ads/comp-900x100-1672024010950.gif)
गृहले ताक्लाकोटमा रहेका नेपालीलाई नआत्तिन र धैर्य गर्न आग्रह गरेको छ । ताक्लाकोटबाट हुम्ला फर्कने बाटोमा पर्ने नारालेकमा १० फिटभन्दा बढी हिउँ जमेको छ । केही दिनअघि मात्रै एक नेपाली त्यही बाटो हुँदै आएका थिए । रोजगारीका क्रममा बझाङको उरै र हुम्लाको हिल्सा नाका हुँदै ताक्लाकोट पुगेकालाई उद्धार गर्न मार्च १ मै जिल्ला प्रशासन कार्यालय हुम्लामा निवेदन परेको थियो ।
त्यसपछि हुम्ला प्रशासनले मौखिक रूपमा निवेदनबारे गृह मन्त्रालयलाई जानकारी गराएको थियो । उद्धारको पर्खाइमा रहेका नेपालीका तर्फबाट हुम्लाका सांसद छक्कबहादुर लामा र कर्णाली प्रदेशका सामाजिक विकासमन्त्री दलबहादुर रावललाई पनि यसबारे जानकारी गराइएको थियो । तर कतैबाट पनि समस्या समाधानमा पहल भएको छैन ।
गृह मन्त्रालयका शान्ति सुरक्षा शाखा प्रमुख उमाकान्त अधिकारीले तत्काल उद्धार गर्न कठिन भएको बताए । कोरोना भाइरस संक्रमणको न्यूनता र मौसम अनुकूलता भएपछि त्यहाँ फसेका नेपालीको समस्या समाधान हुने उनको भनाइ छ । ‘ताक्लाकोट पुगेका नेपालीको अवस्था आत्तिनुपर्ने खालको छैन, मौसम प्रतिकूलका कारण अर्को व्यवस्था गरिहाल्न सक्ने अवस्था पनि देखिँदैन,’ उनले भने ।
ताक्लाकोटमा रहेका नेपालीले आफूहरूलाई उद्धार नगरिए भागेर आउने चेतावनी दिएका थिए । हुम्लाका प्रमुख जिल्ला अधिकारी विनिता भट्टराईले पनि तत्काल ताक्लाकोट पुगेका नेपालीलाई फिर्ता गर्न सक्ने सम्भावना नरहेको बताएकी छन् । कर्णाली प्रदेशका मन्त्री रावलले तत्काल ताक्लाकोटमै बस्न र भागेर नआउन उनीहरूलाई आग्रह गरेका छन् । त्यहाँ रहेका नेपालीलाई चिनियाँ प्रशासनले नियमित स्वास्थ्य जाँच र खानबस्नको व्यवस्था मिलाएको छ ।
सम्बन्धित समाचार :
ताक्लाकोटमा अलपत्र नेपाली भन्छन्- ‘उद्धार नगरे भागेरै आउँछौं’
कोरोना प्रभाव : ताक्लाकोटमा डेढ सय नेपाली अलपत्र
‘अनि हिउँ छिचोल्दै नेपाल फर्किएँ’
![](https://assets-cdn.ekantipur.com/uploads/source/ads/900-x-100-1-0282024055738.gif)