रोहिंग्यालाई हट्न हप्ता दिनको म्याद

नगेन्द्र अधिकारी

काभ्रे — म्यानमारबाट लखेटिएपछि नेपाल आएर काभ्रेको पनौतीस्थित कुशादेवीमा अस्थायी टहरा बनाई बसेका रोहिंग्या शरणार्थीलाई जग्गा छोड्न धनीले ७ दिनको समय दिएका छन् । मंसिर १० गते कुशादेवी झरेका उनीहरुले २३ परिवारका लागि छुट्टाछुट्टै टहरा बनाए पनि जग्गाधनी सत्यराम थापाले हट्न निर्देशन दिएका हुन् । 

शरणार्थी हुन् भन्ने आएको ३ दिनपछि मात्रै थाहा पायौं, काम गर्न अनुमति नभएको र नेपालले शरणार्थी स्वीकार नगरेको थाहा पाएपछि हट्न भनिसकेका छौं ।’ सत्यरामको भनाई उद्धत गर्दै उनका भतिजा रामेश्वरले भने । त्रिवीका एक प्राध्यापकमार्फत रोहिंग्याहरु सत्यरामको सम्पर्कमा पुगेका थिए । खाली रहेको जग्गा भाडामा लागेर पैसा आउने भएपछि बस्न अनुमति दिएको सत्यरामका भतिजा रामेश्वरले बताए ।


रोहिंग्याका टोली नेता महोम्मद युसुफले टहरा निर्माणको लागि ६ लाखभन्दा बढी खर्च भइसकेको भन्दै बस्ने अर्को विकल्प पनि नभएको बताए । ‘यतिका संरचना बनाइसक्यौं, अहिले केके कुराले अप्ठ्यारो भयो भनेर हट्न भन्न थाल्नुभएको छ,’ युसुफले भने, ‘आफ्नो देश हैन, आफ्नो ठाउँ हैन, कहाँ जाने, के खाने केही टुंगो छैन ।’


नेपालले शरणार्थी मान्यता नदिए पनि संयुक्त राष्ट्रसंघीय शरणार्थीसम्बन्धी उच्च आयोग (यूएनएचसीआर)बाट शरणार्थी प्रमाणित उनीहरु काम नपाउने भएपछि अप्ठ्यारोमा परेको बताउँछन् । ‘युनएनएचसीआरले भत्ता दिन पनि छोड्यो, काम गर्न पनि दिँदैन, नेपाली जनताले काम त दिएका छन्, जसरी पनि आफ्नो पेट त पाल्नुपर्यो’ युसुफले भने, ‘बस्न र काम गर्न पनि नदिने हो भने युएनएचसिआरको गेटमा गएर धर्ना दिन्छौं ।’


शरणार्थी सम्बन्धी उच्च आयोगले सन् २०१५ सम्म प्रति परिवारका सदस्य ५ हजार ७ सय ५०, प्रति महिला ३ हजार ७ सय ५० र प्रति बालबालिका २ हजार ७ सय ५० भत्ताबापत दिने गरेको थियो । उक्त सुविधा रोकिएपछि रोहिंग्याहरु अवधै रुपमा काम गर्दै आएका छन् । कुशादेवीमा ९० जना अट्ने गरी संरचना निर्माण भएको छ । युसुफले हालसम्म ६ लाख भन्दा बढी खर्च भइसकेको बताए । कपनको लसुनटारबाट सरेर कुशादेवीमा बस्न थालेका उनीहरुले प्रति परिवार ७० हजार उठाएका थिए । ३४ मध्ये १३ पुरुष, ९ महिला र १२ बालबालिका छन् ।

याे पनि पढ्नुहाेस् → पनौतीमा पनि रोहिंग्या

प्रकाशित : मंसिर २७, २०७६ २०:२७
प्रतिक्रिया
पठाउनुहोस्

पौडेलसँग सल्लाह गरेरै विभाग बढाउने प्रस्ताव : प्रवक्ता शर्मा

सहमति होइन, पेल्ने काम भएको छ : महत 
मधुसुधन भट्टराई

काठमाडौँ — कांग्रेस प्रवक्ता बिश्वप्रकाश शर्माले बिहिबारको केन्द्रीय कार्यसमिति बैठकमा सभापति शेरबहादुर देउवाले पदाधिकारी बैठकबाट पारित एजेण्डा पेश गरेको बताएका छन् । देउवाले आफूखुसी केन्द्रीय कार्यसमिति बैठकमा एजेण्डा पेस गरेको भन्ने वरिष्ठ नेता रामचन्द्र पौडेल पक्षको आरोप निराधार भएको प्रवक्ता शर्माको भनाई छ । 

‘केन्द्रीय कार्यसमिति बैठकमा पेश भएका नौ एजेण्डा बुधबार बसेको पदाधिकारी बैठकले पास गरेका एजेण्डा हुन,’ प्रवक्ता शर्माले इकान्तिपुरसँग भने, ‘पदाधिकारीमा सस्थापन पक्षका नेताहरु मात्र हुनुहुन्न । आदरणिय नेता पौडेल निकटका महामन्त्री शशाङ्क कोइराला र कोषाध्यक्ष सितादेवी यादव पनि हुनुहुन्छ ।’

पदाधिकारी बैठकमा एजेण्डा तय गर्दा अनौपचारिक रुपमा सभापतिले नेता पौडेल र महामन्त्री कोइरालासँगसमेत छलफल गरेको प्रवक्ता शर्माको भनाई छ । ‘पदाधिकारी बैठकमा मात्रै होइन, सभापतिले एजेण्डाका विषयमा नेता पौडेल र महामन्त्री कोइरालासँग अनौपचारिक रुपमा पटक–पटक छलफल गर्नुभएको हो,’ उनले भने, ‘बिहीबार पनि केन्द्रिय कार्यसमिति बैठक अगाडि पार्टी केन्द्रीय कार्यालयमा सहमति खोज्ने प्रयास भएको हो ।’

सहमतिविना विभागको संख्या थप्न प्रस्ताव ल्याएको, भातृ संस्थाको अधिवेशन ६ महिनामा सुनिश्चित गर्न नसकेको, पार्टीको १४ औं महाधिवेशनको कार्ययोजना नल्याएको भन्दै पौडेल पक्षले बिहीबार बसेको केन्द्रीय कार्यसमिति बैठक बहिस्कार गरेको थियो ।
तर, पौडेल निकट नेता रामशरण महतले पदाधिकारी बैठकले निर्णय गर्‍यो भन्दैमा सहमतिमा विभाग बढाउने प्रस्ताव ल्याएको भन्न नमिल्ने बताउँछन् । ‘पदाधिकारी बैठकमा छलफल गर्दैमा सहमतिमा ल्याएको भन्न मिल्दैन,’ महतले इकान्तिपुरसँग भने, ‘सहमतिमा केन्द्रीय समितिमा प्रस्ताव ल्याउने परम्परा कांग्रेसमा पहिलादेखिको हो । अहिले त्यो तोड्दै पेल्ने काम भएको छ । त्यो हामीलाई मान्य छैन् ।’

उनले अहिले भएका विभाग गठनको आवश्यकतासमेत नरहेको बताए । ‘अब महाधिवेशन गर्ने बेला भयो । महाधिवेशन सम्पन्न गरेपछि मात्रै विभाग गठन गर्दा हुन्छ । अहिले विभाग थप्नुको औचित्य छैन्,’ महतले भने ।

देउवाले बैठकमा मौजुदा रहेका २८ विभागलाई बढाएर ४१ पुर्‍याउने प्रस्ताव केन्द्रीय समिति बैठकमा पेश गरेका छन् ।

प्रकाशित : मंसिर २७, २०७६ २०:२०
पूरा पढ्नुहोस्
प्रतिक्रिया
पठाउनुहोस्
×