पनौतीमा पनि रोहिंग्या- समाचार - कान्तिपुर समाचार
कान्तिपुर वेबसाईट
AdvertisementAdvertisement

पनौतीमा पनि रोहिंग्या

नगेन्द्र अधिकारी

(काभ्रे) — म्यानमारबाट लखेटिएपछि नेपाल छिरेर काभ्रेको पनौतीमा बस्दै आएका रोहिंग्या समुदायका मानिसले आफू घर फर्कन तयार रहेको बताएका छन् । उनीहरूले घर फिर्तीका लागि नागरिकता दिनुपर्ने, जग्गालगायत सम्पत्ति फिर्ता हुनुपर्ने सर्त भने रहेको बताए । ‘हाम्रा माग पूरा भए तत्काल घर फर्कन्छौं,’ मोहम्मद यसुपले भने, ‘यूएनएचसीआरले कुरा गरोस् ।’

पनौतीको कुशादेवीमा रहेका उनीहरू बंगलादेश, भारत हुँदै नेपाल आइपुगेका हुन् । उनीहरूले ज्यान जोगाउन म्यानमार छाडेको बताए । जन्मथलोको माया लाग्ने गरेको उनीहरूले सुनाए ।


काठमाडौंबाट मंसिर १० गते यहाँ आइपुगेका रोहिंग्याहरूले चार रोपनी जग्गामा अस्थायी टहरा बनाएका छन् । यहाँ रहेका ३४ जनामध्ये १३ जना पुरुष र ९ जना महिला तथा १२ जना बालबालिका छन् । उनीहरू श्रम गर्ने भन्दै आइपुगेका हुन् । ‘यहाँ ९० जना बस्न मिल्ने संरचना बनाएका छौं,’ श्रम गर्न भन्दै पनौती आएको समूहका नेता मोहम्मद यसुपले भने, ‘हामीलाई काम लगाउने ठेकेदारमार्फत यहाँ आएका हौं । भाडाको कुरा भएको छैन ।’


यो पनि

३० हजार टाकामा भित्रिन्छन् रोहिंग्या

यसुपका अनुसार स्थानीय रामेश्वर थापासँग २०१४ देखि नै चिनजान थियो । थापाले नै बाटाको ठेक्का पाएकाले कामदारका रूपमा उनीहरूलाई कुशादेवी ल्याएका हुन् । थापाले २०७४ सालमा बनेपामा एकीकृत खानेपानीको पाइप बिछ्याउन १४ जना रोहिंग्यालाई काममा लगाएका थिए । उनले नै बस्नका लागि काकाको जग्गा मिलाइदिएका हुन् ।


संयुक्त राष्ट्रसंघीय शरणार्थीसम्बन्धी उच्चायोग (यूएनएचसीआर) बाट शरणार्थी प्रमाणित भएको दाबी गर्ने यसुपले जिल्ला प्रशासन कार्यालय र स्थानीय सरकारलाई पनि जानकारी गराएको बताए । ‘हामी शरणार्थीको प्रमाणपत्र भएका मात्रै छौं, २०१७ देखि एक जना पनि थपिएका छैनन्,’ उनले दाबी गरे । पनौती वडा नं. ३ का अध्यक्ष किशोर थापाले कामदारका रूपमा रोहिंग्या आएको जानकारी भएको बताए ।


प्रमुख जिल्ला अधिकारी श्रवणकुमार तिमल्सिनाले उक्त समूहले आफू आएको जानकारी दिँदै सुरक्षाका लागि निवेदन दिएको बताए । ‘गृह मन्त्रालयमा जानकारी गराएको छु, कानुनत: शरणार्थीले काम गर्न हुँदैन,’ उनले भने, ‘कामदार नपाउने कारण उनीहरूलाई ल्याएको भनेर ठेकेदारले जानकारी दिनुभएको छ, थप विषयमा माथि समन्वय भइरहेको छ ।’


सो समूह परिचालन गर्ने टोली नेतामध्येका एक नूर हापिसका अनुसार टहरा निर्माणका लागि प्रतिपरिवार ७० हजारका दरले खर्च भएको छ । बालबालिकाको शिक्षाका लागि पनि उनीहरूले तयारी थालेका छन् । ‘स्थानीय विद्यालयमा भर्नाका लागि कुरा भइरहेको छ,’ हापिसले भने । हापिस २०१३ मा कोलकाता हुँदै विराटनगरको नाका प्रयोग गरेर नेपाल आएका हुन् । यहाँ आएपछि सन् २०१४ मा विवाह गरेका उनका सन्तानसमेत छन् ।

प्रकाशित : मंसिर २७, २०७६ ०८:२७
प्रतिक्रिया
पठाउनुहोस्

स्थानीय तहको उपनिर्वाचन : धुलिखेल–२ मा ८० प्रतिशत मत खस्यो

नगेन्द्र अधिकारी

काभ्रे — उपनिर्वाचन अन्तर्गत धुलिखेल नगरपालि- २ मा  ८०.२ प्रतिशत मत खसेको छ । मतदान अवधि तोकिएको पाँच बजेभित्र कूल १ हजार ८ सय ७७ मतदाता मध्ये १ हजार ५ सय २ जनाले मतदान गरेको मुख्य निर्वाचन अधिकृत पुरुषोतम ढकालले जानकारी दिए ।

७ सय ५८ महिला र ७ सय ४४ पुरुष मतदाताले मतदान गरेरेका छन् । साविक रविओपी गाविस फुटेर बनेको धुलिखेल-२ मा ९ सय ४९ महिला र ९ सय २८ पुरुष मतदाता थिए ।

तत्कालीन वडाअध्यक्ष राजन कोइरालाको रहस्यमय मृत्यु भएपछि रिक्त पदमा निर्वाचन भएको हो । अघिल्लोपटक वडामा विजय हासिल गरेको नेकपाले देवप्रसाद कोइरालालाई उम्मेदवार बनाएको छ । कांग्रेसले अघिल्लो पटक वडा सदस्य पदका उम्मेदवार रहेका दर्णबहादुर खत्रीलाई उठाएको छ । राजपा नेपालको तर्फबाट कृष्णबहादुर तामाङ र राप्रपा (संयुक्त)कोतर्फबाट बासु थापा उम्मेदवार छन् ।

प्रकाशित : मंसिर १४, २०७६ १८:५७
पूरा पढ्नुहोस्
प्रतिक्रिया
पठाउनुहोस्
×