मलेसिया रोजगारको गाँठो फुक्यो, स्वास्थ्य संस्थाको निरीक्षण गर्न मलेसियाली टोली नोभेम्बरमा आउने सहमति

मापदण्डमा उत्तीर्णलाई बायोमेडिकल प्रणालीमा समावेश गर्छौ : मलेसिया
मलेसिया अबिलम्ब खुल्छ : श्रम मन्त्री
होम कार्की

काठमाडौँ — नेपाल सरकारद्वारा सूचीकृत एकसय २२ मध्ये ८६ वटा नयाँ स्वास्थ्य संस्थालाई निरीक्षण गर्न आगामी नोभेम्बरको पहिलो साता टोली पठाउन मलेसिया सरकार सहमत भएको छ । यसअघि बायोमेडिकल प्रणालीमा समावेश भइसकेका ३६ वटा स्वास्थ्य संस्थाहरुको भने निरीक्षण हुने छैन । दुई महिनाअघि मात्रै मलेसिया सरकारको वार्षिक निरीक्षणमा पास भइसकेकोले उनीहरुले कामदारको स्वास्थ्य परीक्षण गर्न पाउने बाटो खुल्ला भएको छ ।

मलेसियाको पुत्राजयमा नेपाल र मलेसियाका उच्च अधिकारीबीच बिहीबार दिउँसो सम्पन्न संयुक्त कार्यदलको बैठकमा यस्तो सहमति भएको हो। बैठक तीन दिनसम्म चलेको थियो। सहमतिमा दुवै पक्षले हस्ताक्षर गरेका छन्। बैठकको नेतृत्व नेपालको तर्फबाट श्रम, रोजगार तथा सामाजिक सुरक्षा मन्त्रालयका वरिष्ठ सह-सचिव रामप्रसाद घिमिरेले गरेका थिए। बैठकमा परराष्ट्र र कानुन मन्त्रालयका उच्च अधिकारीको पनि सहभागिता थियो।

सहमति पत्रमा मलेसियाको मावन संशाधन नीति विभागका प्रमुख बेट्टी हसन र नेपालको तर्फबाट श्रम मन्त्रालयका सहसचिव घिमरेबीच हस्ताक्षर भएको हो।

‘मलेसियाबाट आउने निरीक्षण टोलीले सूचीकृत नयाँ स्वास्थ्य संस्थाको निरीक्षण गर्नेछ। निरीक्षणमा पास हुने स्वास्थ्य संस्थालाई मात्रै बायोमेडिकल प्रणालीमा समावेश गर्नेछ,’ बैठकमा सहभागी एक अधिकारीले मलेसियाबाट कान्तिपुरलाई भने, ‘पहिलेदेखि नै बायोमेडिकल सुरु भएको संस्थाले काम सुरु गर्न पाउनेछ। मलेसिया सरकारको स्थापित मापदण्ड पुग्नेलाई छनोट गर्नेछ।’

बैठकमा नेपाली टोलीले स्वास्थ्य मापदण्ड पुर्‍याउने संस्थालाई बायोमेडिकलमा सहभागी हुनेपर्ने अडान राखेका थिए। ‘कतिवटा संस्थाहरु छानिनेछ। त्यो सरकारको विषय होइन। विधि अनुसार स्वास्थ्य संस्थाको छनोट हुनुपर्छ,’ बैठकमा नेपाली पक्षले राखेको भनाई उद्धृत गर्दै ती अधिकारीले भने, ‘मापदण्ड पुग्नेले कामदारको स्वास्थ्य परीक्षण गर्न पाउनुपर्छ।’

मलेसियाले सुरुमा तत्कालको लागि ३६ वटा स्वास्थ्य संस्थाहरु नै प्रर्याप्त भएको भन्दै आवश्यकता अनुसार थप गर्दै जाने अडान राखेको थियो।

श्रम, रोजगार तथा सामाजिक सुरक्षा मन्त्री गोकर्ण विष्टले मलेसियाको गतिरोध अबिलम्ब सुचारु हुने प्रतिक्रिया दिए। ‘मलेसियाको रोजगारीलाई सुचारु गर्ने वातावरण बनेको छ,' उनले भने, ‘श्रम समझदारी अनुसार अब चाँडै नेपालीहरु कामको लागि मलेसिया जान पाउनेछन्।’

प्रकाशित : भाद्र २६, २०७६ १४:३३
प्रतिक्रिया
पठाउनुहोस्

नाडेज्दा कप: नेपाल र उज्वेकिस्तान फाइनलमा भिड्दै

नेपाली महिला फुटबल टिमले किर्गिस्तानमा भइरहेको नाडेज्दा कपको फाइनलमा उज्वेकिस्तानविरुद्ध प्रतिस्पर्धा गर्दैछ । खेल १५: ४५ बजे सुरु हुने
राजु घिसिङ

काठमाडौँ — नेपाली महिला टिमले पहिलो उपाधिको खोजीमा नाडेज्दा कपको फाइनलमा उज्वेकिस्तानविरुद्ध बिहीबार प्रतिस्पर्धा गर्दैछ । किर्गिस्तानको काराकोल मैदानमा उज्वेक टिमलाई उपाधिको प्रबल दाबेदार हो । तर, फिफा वरीयतामा ५७ स्थानमाथिको टिमलाई नेपालले कडा चुनौती दिने अपेक्षा गरिएको छ ।

फाइल तस्बिर

चार देश सहभागी प्रतियोगिताको लिग चरणको भेटमा उज्वेकिस्तानले नेपाललाई २-० ले हराएको थियो । राउन्ड रोबिन लिगमा तीनै खेल जितेर उज्वेकिस्तान पहिलो स्थानमा रहेको थियो । नेपालले आयोजक किर्गिस्तानलाई ८-२ र ताजिकिस्तानलाई १-० ले हराएर लिगमा दोस्रो स्थानमा रहँदै उज्वेकिस्तानसँगको फाइनल भेट पक्का गरेको थियो ।

‘हामीले लिग चरणको भेटमा आफ्नै गल्तीमा दुई गोल खाएका थियौं । त्यस्ता गल्तीलाई फाइनलमा सच्याउन चाहन्छौं,’ नेपाली टिमका मुख्य प्रशिक्षक हरि खड्काले काराकोलबाट इका्न्तिपुरलाई प्रतिक्रिया दिए, ‘उज्वेकिस्तानी खेलाडीहरू प्राविधिक र शारीरिक रुपमा उत्कृष्ट छन् । आफ्नो कमी-कमजोरी सुधारेर उनीहरूलाई रोक्ने योजना बनाएका छौं ।’

लिग चरणमा उज्वेकिस्तानसँगको खेलमा घुँडामा चोट बोकेकी कप्तान निरु थापा फाइनलमा खेल्ने छैनन् । उनको स्थानमा सरु लिम्बु मैदानमा उत्रिँदैछिन् ।

नेपाली टिमको मुख्य हतियार साविज्ञा भण्डारी नै हुन् । उनले किर्गिस्तानविरुद्ध चार गोल गरेकी थिइन् भने ताजिकिस्तानविरुद्धको एकमात्र गोल पनि उनकै नाममा रहेको थियो । तर, उनलाई उज्वेक टिमविरुद्ध खुलेर खेल्ने अवसर नहुनसक्छ । यस्तोमा विंगरद्वय अनिता बस्नेत र मन्जली कुमारी योन्जनले लय समात्न आवश्यक छ । नेपालले लिग चरणमा बेहोरेका चारै गोल आफ्नै कमजोरीमा भएकाले डिफेन्समा चामत्कारिक सुधारले मात्रै नेपालले पहिाले अन्तर्राष्ट्रिय उपाधि दिलाउनसक्छ ।

नेपाली महिला टिमले आठ महिनाभित्र तेस्रोपल्ट फाइनल खेल्न लागेको हो । गत फेब्रुअरीमा भुवनेश्वरमा हिरो गोल्डकप र मार्चमा विराटनगरमा साफ च्याम्पियनसिपको उपाधि होडमा प्रतिस्पर्धा गरेको नेपाली टिम नौ वर्षयता आठौंपल्ट फाइनलमा उत्रिदैछ । अघिल्ला सात फाइनलमध्ये दक्षिण एसियाली खेलकुदमा दुईपल्ट र साफ च्याम्पियनसिपमा चारपल्ट भारतविरुद्ध हारेको नेपाललाई हिरो गोल्डकपको उपाधि होडमा म्यान्मारले शिकार बनाएको थियो । त्यसैले उज्वेकिस्तानै बलियै प्रतिद्वन्द्वी भए पनि नेपालले नाडेज्दा कपमा फाइनलमा बेहोर्दै आएको हारको श्रंखलामा पूर्णविराम लगाउने अवसर पाएको छ ।

नेपाली टिम १३ औं दक्षिण एसियाली खेलकुद (साग) को तयारीमा यस प्रतियोगितामा सहभागी भएको हो । काराकोल मैदानमा उज्वेकिस्तानलाई रोक्न त्यति सजिलो छैन । आक्रमक खेलिरहेको उज्वेकिस्तानले लिग चरणका तीन खेलमा विपक्षीलाई गोल गर्न नदिई २३ गोल गरेको थियो ।

सम्भावित नेपाली टिम
गोलकिपर: एन्जिला तुम्बापो
डिफेन्स: हिरा कुमारी भुजेल, अमृता जैसी, पुनम जर्घामगर, गीता राना
मिडफिल्ड: अनिता बस्नेत, दीपा राई, रेनुका नगरकोटे, मन्जली कुमारी योन्जन
फरवार्ड: सावित्रा भण्डारी, सरु लिम्बु

प्रकाशित : भाद्र २६, २०७६ १३:४९
पूरा पढ्नुहोस्
प्रतिक्रिया
पठाउनुहोस्