लकडाउनले अप्ठेरोमा परेका बिरामीलाई अस्पतालसम्म पुर्याउनेलाई कोरोना
काठमाडौँ — बूढानीलकण्ठ नगरपालिका–३ मा सोमबार पुष्टि भएका कोरोना संक्रमित निजी एम्बुलेन्स सञ्चालक रहेको नगरपालिकाले जनाएको छ । ३७ वर्षीय उनले लकडाउनको अवधिमा आफ्नो गाडीलाई एम्बुलेन्सका रूपमा प्रयोग गर्दै आएका थिए ।
‘लकडाउनको अवधिमा अप्ठ्यारोमा परेकाहरूलाई अस्पताल पुर्याउने, राहत बाँड्ने काममा सक्रिय थिए,’ नगर प्रवक्ता नवराज भट्टराईले भने, ‘डाइलसिस गर्नुपर्ने बिरामी, गर्भवतीलगायतलाई अस्पताल पुर्याउने काम गर्दै आएका थिए ।’
नगरपालिकाले जेठ ८ र ९ गते १ सय १ जनाको स्वाब संकलन गरी राष्ट्रिय जनस्वास्थ्य प्रयोगशाला टेकु पठाएको थियो । ‘जसमध्ये ६० जनाको नतिजा नेगेटिभ र एक जनाको नतिजा पोजिटिभ आएको हो,’ उनले भने, ‘४० जनाको नतिजा आउन बाँकी छ ।’
इपिडिमियोलजी तथा रोग नियन्त्रण महाशाखा र नगरपालिकाको स्वास्थ्य शाखाको टोलीले ती व्यक्तिको सम्पर्कमा आएका व्यक्तिको खोजी सुरु गरिसकेको उनले बताए । उनलाई अहिले टेकु अस्पतालको आइसोलेसन वार्डमा राखेर उपचार गरिँदै छ ।
सोमबार काठमाडौंका ३ जनासहित थप ७२ जनामा कोरोना संक्रमण पुष्टि भएको छ । योसँगै नेपालमा संक्रमितको संख्या ६ सय ७५ पुगेको छ ।
प्रकाशित : जेष्ठ १२, २०७७ १२:५५