दक्षिण एसियाली शैक्षिक प्रणालीले पाठ्यक्रमका अपेक्षा, प्रभावकारी मूल्यांकन र विद्यार्थीका बदलिँदा आवश्यकताबीच सन्तुलन कायम गर्नुपर्ने चुनौतीका बीच सम्मेलन आयोजना गर्न लागिएको हो । अंग्रेजी भाषा अझै पनि शैक्षिक, प्राज्ञिक तथा व्यावसायिक अवसरको महत्वपूर्ण माध्यम भए पनि शिक्षण अब भाषा सिकाइमा मात्र सीमित नरही आलोचनात्मक सोच, सहकार्य, विद्यार्थीको स्वायत्तता र सिकाइप्रतिको स्वामित्व विकासमा केन्द्रित हुनुपर्नेमा सम्मेलनले जोड दिने जनाइएको छ ।

सम्मेलनमा मुख्य प्रस्तुति, अनुभवमा आधारित छलफल तथा कक्षाकोठाका असल अभ्यास प्रस्तुत गरिनेछन् । सहभागीहरूले दक्षिण एसियाका साझा शैक्षिक चुनौतीको स्थानीय सन्दर्भमा अपनाइएका समाधान तथा प्रभावकारी शिक्षण अभ्यासबारे जानकारी लिन सक्नेछन् ।

ब्रिटिस काउन्सिल नेपालका कन्ट्री डाइरेक्टर रुस्तम मोदीले प्रभावकारी सञ्चार, सहकार्य र आलोचनात्मक सोचजस्ता सीप विकासका लागि सिर्जनशीलताको महत्त्वपूर्ण भूमिका रहने बताए । उनले सम्मेलनले अनुसन्धानमा आधारित दृष्टिकोण, व्यवहारिक अभ्यास र कक्षाकोठामा कार्यान्वयन गर्न सकिने रणनीतिबारे शिक्षक तथा शिक्षा क्षेत्रका सरोकारवालालाई जानकारी दिने विश्वास व्यक्त गरे ।