ललितपुर — 'रिट्रिभल मेडिसिन' सम्बन्धी 'एड्भान्स ट्रेनिङ एण्ड ट्रेनिङ अफ ट्रेनर्स (टिओटी) पाँच दिने तालिम सम्पन्न भएको छ । 

'रिट्रिभल मेडिसिन'मा स्वास्थ्यकर्मीहरूको क्षमता अभिवृद्धि गर्ने उद्देश्यले नेपाल मेडिसिटीमा तालिम आयोजना गरिएको हो ।

रिटिभल मेडिसिन भनेको गम्भीर बिरामीलाई एक स्थानबाट अर्को स्थानमा सुरक्षित रूपमा स्थानान्तरण गर्दै जाँदा आवश्यक पर्ने उन्नत आपतकालीन चिकित्सा सेवा प्रदान गर्ने चिकित्सा शाखा हो । यसमा विशेषगरी प्रि-हस्पिटल केयर, एम्बुलेन्स सेवा, हेलिकप्टर रेस्क्यु तथा ट्रान्सफरका क्रममा बिरामीको जीवन रक्षा गर्ने सीपहरू समावेश हुन्छन् ।

तालिममार्फत चिकित्सक, नर्स तथा प्यारामेडिक्सलाई आपतकालीन चिकित्सा सेवा तथा प्रि-हस्पिटल केयर विशेषगरी हेलिकप्टर रेस्क्यु सम्बन्धी दक्ष बनाउने प्रयास गरिएको छ । साथै, तालिमले सहभागीहरूलाई भविष्यमा अन्य स्वास्थ्यकर्मीलाई तालिम दिन सक्ने प्रशिक्षकका रूपमा तयार पार्ने प्रयास गरिएको आयोजकले जनाएको छ ।