काठमाडौँ — भक्तपुरको नेपाल इन्जिनियरिङ कलेजमा ‘साइबर सेक्युरिटी सिम्पोजियम २०२६ र टेकस्प्रिन्ट ह्याकाथन’ सम्पन्न भएको छ । यस प्रतिस्पर्धामा देशभरका इन्जिनियरिङ विद्यार्थीहरूले उत्साहजनक सहभागिता जनाएका थिए । टेकस्प्रिन्ट ह्याकाथन विधामा सनवे कलेजको ‘भिजनरी’ समूहले प्रथम स्थान हासिल गर्दै ५० हजार रुपैयाँ नगद पुरस्कार जितेको छ । यस समूहमा संकेत श्रेष्ठ, प्रशान्त अधिकारी, प्रियाना खत्री र स्मृति बस्नेत रहेका थिए ।

प्रतियोगितामा ‘ट्यारोट’ समूह प्रथम रनर-अपका रूपमा २५ हजार रुपैयाँ पुरस्कार प्राप्त गर्‍यो । आयुष श्रेष्ठ, अभिषेक श्रेष्ठ, विष्णु शर्मा र अश्विनी सेढाईं सम्मिलित यस समूहले ‘सब्सिडी गार्ड’ नामक एआईमा आधारित प्रणाली विकास गरेको थियो । यसैगरी ‘ह्याक द थ्रोन’ समूह दोस्रो रनर-अप हुँदै १५ हजार रुपैयाँ जित्न सफल भयो । मिराज भट्टराई, सफल तामाङ, फेमस ढुंगाना र अभिश्रेन्त खत्रीको यस टोलीले क्यूआरमा आधारित डिजिटल शैक्षिक रिपोर्ट प्रणाली प्रस्तुत गरेको थियो ।