काठमाडौँ — लिट्मस इन्डस्ट्रिज लिमिटेडले इलेक्ट्रीशियनहरूका लागि सीप सुधार कार्यक्रम आधिकारिक रूपमा सुरु गरेको छ ।

शिक्षा, दक्षता र सुरक्षा भन्ने कम्पनीको नारामा आधारित विशेष सीपमूलक कार्यक्रम सुरुमा काठमाडौंमा सञ्चालन गर्न लागिएको र निकट भविष्यमै देशव्यापी रूपमा विस्तार गर्ने योजना रहेको जनाएको छ । लिट्मसका उत्पादन प्रयोग गर्ने इलेक्ट्रीशियनहरूका लागि विशेष रूपमा सीप सुधार कार्यक्रम तयार गरिएको हो । यसले कम्पनीले आफ्ना ग्राहकप्रति राखेको जिम्मेवारी र योगदानको प्रतिबिम्ब देखाउँछ ।

यो पहलमार्फत लिट्मसले प्राविधिक सीपलाई थप सुदृढ बनाउँदै देशभर सुरक्षित विद्युतीय अभ्यासलाई प्रवर्द्धन गर्ने लक्ष्य लिएको छ । बीस दिने तालिम कार्यक्रममा सैद्धान्तिक र व्यवहारिक दुवै पक्षमा ध्यान केन्द्रित गरिनेछ ।

यसमा औद्योगिक विद्युतीय वायरिङ तथा स्थापना, मोटर कन्ट्रोल प्रणाली, अर्थिङ, लाइटनिङ प्रोटेक्सन, जेनेरेटर प्रणाली तथा अन्य आवश्यक ह्यान्ड्स–अन सीपहरू समावेश छन् ।

इलेक्ट्रीशियनहरूको दक्षता अभिवृद्धि गरी सुरक्षित वायरिङ र गुणस्तरीय विद्युत् सुनिश्चित गर्नु यस कार्यक्रमको मुख्य उद्देश्य रहेको छ । यो तालिम सीटीईभीटीसँग आबद्ध बालाजु स्कुल अफ इन्जिनियरिङ एन्ड टेक्नोलोजीसँगको सहकार्यमा सञ्चालन भइरहेको लिट्मसले जनाएको छ । यसबाट संरचित, उद्योग–सम्बन्धित र मापदण्डयुक्त प्राविधिक शिक्षा सुनिश्चित हुने बताइएको छ ।