काठमाडौँ — सामसङ इनोभेसन क्याम्पस (एसआईसी) नेपालले एआई तथा बिग डेटा सम्बन्धी तालिम कार्यक्रम सम्पन्न गरेको छ । गत जुन २७ देखि डिसेम्बर ३० सम्म सञ्चालन गरिएको उक्त कार्यक्रमसँगै कोडिङ तथा प्रोग्रामिङको नयाँ ब्याच पनि सुरु गरिएको सामसङले जनाएको छ ।

कार्यक्रममार्फत सहभागी विद्यार्थीलाई व्यवहारिक सिकाइ, उद्योगसँग सान्दर्भिक ज्ञान र उदीयमान प्रविधिमा प्रत्यक्ष अनुभव प्रदान गरिएको थियो । तालिम पूरा गरेका विद्यार्थीलाई प्रमाणपत्र प्रदान गर्दै सम्मान गरिएको छ ।

२०२३ देखि सामसङको विश्वव्यापी कर्पोरेट सामाजिक उत्तरदायित्व (सीएसआर) दृष्टिकोण ‘टुगेदर फर टुमारो इनएबलिङ पिपुल’ अनुरूप सञ्चालन हुँदै आएको सामसङ इनोभेसन क्याम्पसले युवालाई भविष्य–तयार सीप प्रदान गर्दै नवप्रवर्तनकर्ता र समस्या समाधानकर्ताको विकासमा जोड दिँदै आएको छ ।

कार्यक्रमको समापन समारोहमा एआई तथा बिग डेटा कार्यक्रमबाट स्नातक भएका विद्यार्थीको उपलब्धि उत्सव मनाइयो । साथै, एसआईसीको पाठ्यक्रमअन्तर्गत सुरु हुन लागेको कोडिङ तथा प्रोग्रामिङ कोर्सका नयाँ विद्यार्थीलाई स्वागत गरिएको थियो । उक्त पाठ्यक्रमले प्राविधिक तालिमसँगै डिजिटल साक्षरता, सिर्जनशीलता, समस्या समाधान क्षमता र रोजगारीयोग्यता अभिवृद्धिमा केन्द्रित रहने जनाइएको छ ।

सामसङ नेपालका म्यानेजिङ डाइरेक्टर चाङ उक जङले युवालाई नेपालको भविष्यको नवप्रवर्तनको प्रमुख आधारका रूपमा हेर्ने गरिएको बताए । 'युवालाई भविष्य–तयार सीपले सुसज्जित गर्नु शिक्षामा मात्र सीमित विषय होइन, यो देशको दीर्घकालीन प्रगतिमा गरिएको लगानी हो,' उनले भने । एआई तथा बिग डेटा कार्यक्रमका स्नातकसँगै कोडिङ र समस्या समाधानमार्फत नेपालको डिजिटल क्षमतालाई थप सुदृढ बनाउने लक्ष्य रहेको उनको भनाइ थियो ।