काठमाडौँ — एनएमबी बैंकले नेपाल क्लियरिङ हाउस लिमिटेड (एनसीएचएल) सँगको सहकार्यमा नयाँ पेमेन्ट गेटवे सुरु गरेको छ । देशभर डिजिटल कारोबारलाई सरल र सुरक्षित बनाउन कार्डमा आधारित अनलाइन पेमेन्ट गेटवे सुरु गरेको बैंकले जनाएको छ । 

उक्त पेमेन्ट गेटवेले भौतिक र अनलाइन ई–कमर्स दुवै प्रकारका व्यवसायीहरूलाई ठूलो सहयोग पुर्‍याउने संस्थाले जनाएको छ । सो गेटवेमार्फत व्यवसायीहरू तथा नेपालभित्र तथा अन्य देश जुनसुकै बैंकले जारी गरेका भिजा/मास्टरकार्डमार्फत ग्राहकहरूबाट भुक्तानी लिन सक्नेछन् । उक्त सेवा नेपालभित्र र विदेशबाट पनि भुक्तानी स्वीकार गर्न सकिने भएकाले व्यवसायीहरूलाई  व्यवसाय विस्तार गर्न ठूलो मद्दत पुग्ने बैकले जनाएको छ ।

पेमेन्ट गेटवेमा 'थ्री डी सेक्योर' प्रविधि समावेश गरिएको छ । यसले कारोबारको प्रमाणीकरण (भेरिफिकेसन) का लागि (वोटीपी) वा पासवर्ड आवश्यक पर्ने र कारोबारलाई अतिरिक्त सुरक्षित बनाउँने बैंकले जनाएको छ । यसरी कार्डबाट हुने कारोबारहरू धेरै सुरक्षित हुने र अनाधिकृत खरिदको जोखिमलाई उल्लेखनीय रूपमा कम गर्दछ । सुरक्षाको यो प्रतिबद्धताले उपभोक्ता र व्यवसायी दुवैलाई ठूलो विश्वासका साथ अनलाइन व्यापार गर्न सुनिश्चित गर्नेछ भन्ने विश्वास बैंकले लिएको छ  ।