गत शुक्रबार सुरु भएको प्रदर्शनीमा अटिजम भएका २१ जना युवाहरूले सिर्जना गरेका कलाकृति प्रस्तुत गरिएका छन्।
What you should know
काठमाडौँ — आर्टुडियोले पाटनको नकबाहिलमा नयाँ विङ सुरु गरेको छ । आर्टुडियोले विङ शुभारम्भका अवसरमा (अन)सिन नामक पप–अप प्रदर्शनीसमेत गरेको छ ।
गत शुक्रबार सुरु भएको प्रदर्शनीमा अटिजम भएका २१ जना युवाहरूले सिर्जना गरेका कलाकृति प्रस्तुत गरिएका छन्।
आर्टुडियोका संस्थापक कैलाश के श्रेष्ठद्वारा क्युरेट गरिएको प्रदर्शनीले आर्टुडियोको समावेशिता र समुदायकेन्द्रित सृजनात्मक अभ्यासप्रतिको प्रतिबद्धता दर्शाएको आर्टुडियोले जारी गरेको विज्ञप्तिमा उल्लेख छ ।
आकार फाउन्डेसनसँगको सहकार्यमा आर्टुडियो र अटिज्म केयर नेपाल सोसाइटीमा सञ्चालन गरिएका कार्यशालाको परिणामस्वरूप (अन)सिनको जन्म भएको विज्ञप्तिमा जनाइएको छ र्। यहाँ प्रस्तुत भएका कलाकृतिहरू भरोसा, खोज–अनुसन्धान, धैर्य र सहज प्रयोग–अनुभवबाट सिर्जना भएका हुन्।
प्रत्येक कलाकृतिले सहभागी कलाकारहरूको व्यक्तिगत संसारको झल्को दिन्छन्, जहाँ उनीहरूले देखेका मौलिक अनुभूति र दृष्टिकोणहरू रेखा, स्पर्श, रङ, अमूर्त आकार, लय र दृश्य संरचनाहरूमार्फत प्रस्तुत भएका छन्,’ विज्ञप्तिमा भनिएको छ ।
(अन)सिन शीर्षकले कला, सिर्जना र भावनाहरू बुझ्ने क्षमतालाई इंगित गर्छ, जुन प्रायः परम्परागत कला वा सामाजिक संरचनाहरूभित्र छुटिरहेको हुन्छ। प्रदर्शनीले दर्शकहरूलाई सुस्तरी अवलोकन गर्न, संवेदनशीलतापूर्वक नियाल्न र भाषिक वा शैक्षिक सीमाभन्दा परका अभिव्यक्तिसँग भावनात्मक रूपले जोडिन आग्रह गर्ने कार्यक्रममा बताइयो ।
‘(अन)सिन अटिजमसँग सम्बन्धित प्रदर्शनी होइन, यो त आफ्नै तरिकाले संसारलाई बुझ्ने र देखाउने कलाकारहरूको प्रदर्शनी हो,’ क्युरेटर कैलाश के श्रेष्ठले भने, ‘उनीहरूको अभ्यासले कलालाई पहिचानको माध्यम र सम्भावनाको क्षेत्रका रूपमा उजागर गर्छ, जहाँ बाहिरी नियमहरूले कुनै बाधा गर्दैनन् ।’
आर्टुडियोको पाटन विङ उद्घाटनका अवसरमा ललितपुर महानगरपालिकाका मेयर चिरिबाबु महर्जनसमेत सहभागी थिए । पाटन आफैंमा एउटा विशाल संग्रहालय रहेको र यो कलाको मन्दिरका रुपमा परिचित रहेको बताए ।
