काठमाडौँ — नेपालको अग्रणी भुक्तानी प्रणाली सञ्चालक फोनपेले आधिकारिक रूपमा सिटीपेलाई आफ्नो पारिस्थितिकी प्रणालीमा एकीकृत गरिएको दशौँ डिजिटल वालेटको रूपमा स्वागत गरेको छ । यस उपलब्धिले नेपालमा सहज, सुरक्षित र समावेशी डिजिटल भुक्तानी वातावरण निर्माण गर्ने फोनपेको दृष्टिलाई अझ बलियो बनाएको छ।

साझेदारीमार्फत सिटीपे वालेट प्रयोगकर्ताले अब फोनपेको राष्ट्रव्यापी अन्तरसञ्चालित क्यूआर नेटवर्कमा पहुँच पाउनेछन् । जसअन्तर्गत उनीहरूले देशभर १७ लाखभन्दा बढी व्यापारी आउटलेटमा भुक्तानी गर्न सक्नेछन् ।

हाल फोनपे नेटवर्कले ६० भन्दा बढी बैंक र वित्तीय संस्थालाई जोडेका छन्। बढ्दो संख्यामा वालेट साझेदारलाई पनि समेट्दै आएको यस नेटवर्कले लाखौँ प्रयोगकर्तालाई सुरक्षित र तत्काल डिजिटल कारोबारको सुविधा दिँदै आएको छ ।

सिटीपेलाई स्वागत गर्दै, फोनपेले वित्तीय समावेशीकरणलाई थप मजबुत बनाउने र नेपालभर नगदरहित कारोबार प्रवर्द्धन गर्ने आफ्नो भूमिकालाई सुदृढ बनाएको छ ।

'हाम्रो पारिस्थितिकी प्रणालीमा सिटीपे स्वागत गर्नु हाम्रो यात्रामा एक महत्वपूर्ण कदम हो। प्रत्येक नयाँ एकीकरणले नेटवर्कलाई अझ बलियो, समावेशी र नेपाली जनताको लागि मूल्यवान् बनाउँछ,' फोनपेका सीइओ दिवस कुमारले भने,  'हाम्रो उद्देश्य केवल वालेट र बैंकलाई जोड्नु मात्र होइन, प्रत्येक व्यक्ति र व्यवसायलाई डिजिटल भुक्तानीको वास्तविक सुविधा र विश्वास अनुभव गराउनु हो।'

यो साझेदारी केवल प्रविधिबारे नभई लाखौँ रेमिट्यान्स लाभार्थीलाई सशक्त बनाउनेबारे रहेको सिटीपेका सीइओ विनय रेग्मीले बताए । 'सिटीपे र फोनपे सँगै प्रयोगकर्ता र व्यापारीलाई सहज, सुरक्षित र तत्काल कारोबार गर्न सक्षम बनाउनेछन्। यो एकीकरणले देशभरका ग्राहकलाई सहज र भरपर्दो भुक्तानी अनुभव सुनिश्चित गर्ने अपेक्षा गरिएको छ,' उनले भने ।