सम्झौता अनुसार एसियाकै पुरानो इन्जिनियरिङ कलेज इन्डियन इन्स्टिच्युट अफ टेक्नोलोजी रुड्कीले आफ्नो ‘सस्टेनेबल एनर्जी सेन्टर’ मार्फत निक्कीका सदस्यलाई अध्ययन, अध्यापन तथा कार्यशालामा सहभागिता गराउनेछ ।
What you should know
काठमाडौँ — नेपाल–भारत चेम्बर अफ कमर्स एन्ड इन्डस्ट्री (निक्की) र इन्डियन इन्स्टिच्युट अफ टेक्नोलोजी रुड्की (आईआईटी रुड्की) ले सौर्य, ऊर्जा भण्डारण, हरित हाइड्रोजन, माइक्रो ग्रीड, क्षमता अभिवृद्धि तालिम तथा उद्योग-शैक्षिक संस्थाबीच सहकार्यका आपसी सहमति भएका अनुसन्धानका क्षेत्रमा सहकार्य गर्ने गरी सम्झौता भएको छ ।
निक्कीका महानिर्देशक केएम सिंह र आईआईटी रुड्कीका डिन प्रा. विवेककुमार मलिकले आ–आफ्नो संस्थाको तर्फबाट सम्झौतामा हस्ताक्षर गरेका हुन् । सम्झौता अनुसार एसियाकै पुरानो इन्जिनियरिङ कलेज इन्डियन इन्स्टिच्युट अफ टेक्नोलोजी रुड्कीले आफ्नो ‘सस्टेनेबल एनर्जी सेन्टर’ मार्फत निक्कीका सदस्यलाई अध्ययन, अध्यापन तथा कार्यशालामा सहभागिता गराउनेछ ।
निक्कीले सम्भावित विद्यार्थीलाई नवप्रवर्तनशील प्रविधितर्फ आकर्षित गर्न आईआईटी रुड्कीमा ह्याकाथन र प्रदर्शनी आयोजना गर्न सहयोग गर्नेछ । यस्ता कार्यक्रम समयानुकूल र आपसी सहमति अनुसार हुनेछन् ।
सम्झौता हस्ताक्षरपछि निक्कीका अध्यक्ष सुनिल केसीले भने, 'आगामी दिनमा निक्कीका लागि अझ बलिया र भरपर्दा साझेदार आवश्यक छन् । उद्योग र शैक्षिक क्षेत्रबीचको खाडललाई निक्कीले देशभित्र र विश्वकै उत्कृष्ट संस्थासँग सहकार्य गरेर पुलको काम गरिरहेको छ ।'
उनले थपे, 'निक्की–आईआईटी रुड्की सहकार्यले नेपालको गेम–चेञ्जर ऊर्जा क्षेत्रमा ठूलो टेवा पुर्याउनेछ । यसले नवीकरणीय ऊर्जा विकासलाई अघि बढाउनेछ । लगानी बढेसँगै दक्ष जनशक्तिको आवश्यकता पर्ने भएकाले यस सहकार्यले नेपालको आर्थिक वृद्धिमा पनि योगदान पुर्याउनेछ ।'
द्विदेशीय चेम्बर निक्कीले नेपाल र भारतका सरकारी तथा गैरसरकारी निकायसँग काम गर्दै दुवै देशका उद्यमी र प्रमुख सरोकारवालालाई जोड्ने काम गरिरहेको छ । यसले रणनीतिक साझेदारी र उपक्रमको स्थापना तथा निरन्तरतामा सहयोग पुर्याउँदै आएको छ ।
आईआईटी रुड्कीले आफ्ना संकाय तथा प्रयोगशालामा रहेका शैक्षिक तथा अनुसन्धान र विकास स्रोतलाई उद्योग तथा अन्य प्रयोगकर्तासँगको परियोजना सम्झौता अनुसार परिणाम विकास र वितरणमा प्रयोग गर्दै आएको छ । सम्झौता अनुसार निक्की र आईआईटी रुड्कीबीचको सम्बन्ध दुवै संस्थाका लागि लाभदायी हुने बताइएको छ ।
सन् १८४७ मा रुड्की कलेजका रूपमा सुरु भएको आईआईटी रुड्की एसियाको पहिलो इन्जिनियरिङ कलेज हो । नेपालका पहिलो पुस्ताका अधिकांश इन्जिनियर पनि यही संस्थाबाट शिक्षित भएका छन् । भारतको प्रविधिगत विकास, औद्योगिक वृद्धिदेखि पूर्वाधार, जलस्रोत, ऊर्जा र दिगोपनासम्बन्धी नीतिनिर्माणसम्ममा आईआईटी रुड्कीले महत्त्वपूर्ण भूमिका खेलेको छ ।
