विद्यार्थीहरूले क्षतिपूर्ति दिनु पर्ने, निर्णयमा संलग्न सरकारी अधिकारीमाथि कारबाही गर्नुपर्ने माग गरेका छन् ।
सिरहा — सिरहामा परीक्षाका बेला जफत गरिएका मोबाइल नष्ट गरेको घटनाविरुद्ध विद्यार्थीले जिल्ला प्रशासन कार्यालय (सीडीयो) घेराउ गरेका छन् । संयुक्त विद्यार्थी संगठनको आयोजनामा विद्यार्थीहरूले सिरहा सदरमुकाममा सोमबार प्रदर्शन गर्दै जिल्ला प्रशासन कार्यालय घेराउ गरेका हुन् ।
उनीहरूले मोबाइल नष्ट गरिएका विद्यार्थीहरूलाई क्षतिपूर्ति दिइनुपर्ने, यस निर्णयमा संलग्न सरकारी अधिकारीमाथि कारबाही गर्नुपर्ने माग गरेका छन् ।
प्रमुख जिल्ला अधिकारी नेतृत्वको परीक्षा समन्वय समिति मातहतको उपसमितिले एसईई र कक्षा १२ को परीक्षाका क्रममा परीक्षार्थीहरूबाट जफत गरिएका करिब ४९६ थान मोबाइल फोन तथा ५ वटा स्मार्ट घडी गत बिहीबार पानीमा डुबाएर नष्ट गरेको थियो । ती सामग्रीको अनुमानित बजार मूल्य एक करोड रुपैयाँभन्दा बढी हुन्छ ।x
