महोत्तरी — गौशालाको मरहा नदीमा अवैध उत्खनन् गम्भीर त्रुटि भएको जिल्ला अनुगमन उपसमितिले ठहर गरेको छ ।

नदी किनारमा रहेका क्रसर उद्योगहरु रातिको समयमा २० फिट गहिराईसम्म उत्खनन् गरी बालुवाले छोपेर लुकाउन खोजेको र दर्जनौं स्थानमा १० फिट भन्दा गहिरो खाल्डो अझै फेला परेको जिल्ला अनुगमन उपसमितिका संयोजक जिल्ला समन्वय अधिकारी राधेश्याम ठाकुरले बताए।

'रातिको समयमा नदीमा चरम दोहन गरी राजश्व चुहावट हुनुको साथै मापदण्ड विपरीत नदी उत्खनन् हुँदा पनि स्थानीय तहबाट अनुगमन नहुनु गम्भीर त्रुटि हो,' जिल्ला समन्वय अधिकारी ठाकुरले भने,‘मरहा नदीमा क्रसर उद्योगले जताततै जथाभावी उत्खनन् गरेको छ । प्राविधिकहरुले नापजाँच गरी उत्खनन् भएको क्षेत्रफल र परिमाण निकाल्ने छ । खोलामा तहसनहस हुँदा पनि कुनै निकायले थाहा नपाउनु दुखद हो ।’

प्राविधिकहरुको सुझावसहित तयार हुने अनुगमन प्रतिवेदन सार्वजनिक गरी दोषीलाई कानुनी कारवाही प्रक्रिया अगाडि बढाइने उनले बताए। खोला उत्खननका लागि गौशाला नगरपालिकाले ठेक्का नलगाएको र उत्खननका लागि तोकिएको मापदण्ड विपरीत नदी किनारमै अवैध स्टक राखिएको ठाकुरले बताए ।

मरहा नदीमा नियमित रुपमा अवैध उत्खनन् भएको गुनासो आएपछि अनुसन्धान अगाडि बढाउन अनुगमन गरिएको गौशाला नगरपालिकाकी उपप्रमुख रेणु महतोले बताइन् ।

क्रसर उद्योगहरुले रातिको समयमा नदीमा टिपर नै डुब्ने खाल्डो बनाएर अवैध उत्खनन् गरिरहेको समाचार कान्तिपुरमा प्रकाशित भएपछि जिल्ला अनुगमन उपसमिति र प्रमुख जिल्ला अधिकारीको नेतृत्वमा सुरक्षा निकायका प्रमुखहरुले नदी अनुगमन गरेका हुन् ।

नदीको बीचमा खाल्डोमै टिपर लुकाएर जेसीबीले उत्खनन् गरी नदीजन्य पदार्थको चोरी निकासी भइरहेको थियो। नदीबाट खनेर किनारमै रहेको क्रसरमा स्टक गरेपछि अवैध उत्खनन् वैध बनिरहेको छ।