पाल्पा — एक सातायता पाल्पामा विषालु च्याउ सेवन गरेर दुई जनाको मृत्यु भएको छ भने दर्जनभन्दा बढी बिरामी भएका छन् ।

जंगलबाट खोजेर ल्याएको च्याउ पकाएर खाएका रम्भा गाउँपालिका–५, ताहुँ ओमभन्ज्याङ नजिकैका ६६ वर्षीया विनिमाया कामु मगर र ३७ वर्षीया बालकुमारी खाम्चाको मृत्यु भएको प्रहरीले जनाएको छ । दुवैको उपचारका क्रममा तानसेनस्थित मिसन अस्पतालमा मृत्यु भएको हो ।

कामुमगरको ४ गते र खाम्चाको ५ गते मृत्यु भएको अस्पतालले जनाएको छ । सोही गाउँकै ५० वर्षीया यानुमाया जर्घाको मिसन अस्पतालमा उपचार भइरहेको छ । उनको अवस्था गम्भीर रहेको अस्पतालले जनाएको छ । 

१६ वर्षका ३ त्रासदी : जंगली च्याउले लियो चेपाङ गाउँका १६ जनाको ज्यान 

गत जेठ १ गते जंगलबाट च्याउ ल्याएर खाएका उनीहरु बिरामी परेपछि ताहुँस्थित प्राथमिक स्वास्थ्य केन्द्रमा उपचारपछि तानसेनस्थित मिसन अस्पतालमा उपचारका लागि पठाइएको थियो । तानसेन नगरपालिका–११, भालुवन घर भई तानसेन नगरपालिका–४, बस्दै आएका एकै परिवारका चार जना बिरामी परेका छन् । उनीहरुको मिसन अस्पतालमा उपचार भइरहेको छ ।