दाङ — मुक्त कमलरीले थारु समुदायको महत्त्वपूर्ण चाड गुरही धुमधामका साथ मनाएका छन् । मंगलबार दाङमा जम्मा भएका पश्चिम तराईका विभिन्न जिल्लाका मुक्त कमलरीले सामूहिक रूपमा गुरही पर्व मनाएका हुन् । 

बालबालिकाले खेलाउने कपडाका साना गुडिया महिलाले भुइँमा फ्याक्ने र त्यसलाई रोग व्याधिको प्रतीकका रूपमा पुरूषले हरियो पातसहितको लट्ठीले पिट्ने चलन छ । थारू गाउँको चोकमा गुडिया फालिसकेपछि घरबाट पकाएर ल्याएका विभिन्न गेडागुडीका परिकार सबैलाई बाँडेर खाने चलन छ । 

थारू समुदायले गाइने कीरालाई गुरही कीरा भन्छन् । खेतीपाती सकिएपछि बालीनालीमा कीरा नलाग्न र गाउँमा रोग नलागोस् भनेर उक्त पर्व मनाइने परम्परा रहेको थारू अगुवा बताउँछन् । थारू जाति प्रकृतिपूजक मानिन्छन् । प्रकृतिप्रति विश्वास गर्ने भएकाले गुरहीको पूजा गरिन्छ । गाइने कीराले लामखुट्टे र धानमा लाग्ने कीरा खान्छ । गाइने कीराले कीरा खाएर बालीनाली जोगाउने भएका कारणले पनि यो पर्व मनाइने गरिएको उनीहरु बताउँछन् ।