अमेरिका — अमेरिकाको कोलोरोडो राज्यमा अन्तर्राष्ट्रिय नेपाली साहित्य सम्मेलन आयोजना गरिएको छ । अन्तर्राष्ट्रिय नेपाली समाज (अनेसास)ले कोलोराडोमा नवौं संस्करणको नेपाली साहित्य सम्मेलन आयोजना गरेको हो ।

२२ देखि २५ मेसम्म आयोजना गरिएको साहित्य सम्मेलनको उद्घाटन मदन पुरस्कार विजेता नवराज लम्सालले गरेका थिए । तीन दिनसम्म सञ्चालन हुने सम्मेलनमा ‘इतिहासमा आख्यान र आख्यानमा इतिहास’, ‘नेपाली भाषा साहित्यको प्रवर्द्धनमा प्रवासी पत्रकारिताको भूमिका’लगायत महत्त्वपूर्ण छलफल र विभिन्न ओहोदामा रहेका साहित्यकार, लेखक, पत्रकारले नेपाली डायस्पोरामा फैलिँदो नेपाली साहित्यका विषयमा विमर्श गरेका छन् । सम्मेलनअन्तर्गत नेपाल अमेरिका पत्रकार संघ (नेजा)सँगको सहकार्यमा ‘नेपाली भाषा साहित्यको प्रवर्द्धनमा प्रवासी पत्रकारिताको भूमिका’ विषयक अन्तर्क्रियासमेत आयोजना गरिएको थियो ।

सम्मेलनको उद्घाटन गर्दै लम्सालले अन्तर्राष्ट्रिय नेपाली साहित्य समाज नेपालीभाषी साहित्यकारहरूको अन्तर्राष्ट्रिय संसदका रुपमा रहेको दाबीसमेत गरे । नेपालको सिमानाभन्दा बाहिर लेखिने नेपाली साहित्यलाई अलग राखेर नेपाली साहित्य पूरा नहुने उनको भनाइ थियो । लम्सालले नेपालको सिमानाभन्दा बाहिर रहेका स्रष्टाहरूले लेखिने साहित्यलाई अलग राखेर नेपाली भाषा र साहित्य अधुरो हुने बताए । सम्मेलनमा लम्सालसहित मदन पुरस्कार विजेता डा. निलम कार्की निहारिका, समालोचक महेश पौडेल र राजन आचार्यलाई सम्मान गरिएको थियो ।