इलाम — ‘चियाको सहर’ इलाममा शुक्रबारदेखि दुई दिनसम्म  ‘लिटरेचर फेस्टिभल’ आयोजना हुँदैछ । 

इलाम नगर साहित्य–कला–संगीत प्रतिष्ठानको आयोजनामा हुने दुई दिने उत्सवमा राजनीति, भूराजनीति, शिक्षा, साहित्य, कला, पर्यटन, पर्यावरण र इतिहासजस्ता विषयमा चर्को बहस–विमर्श हुने छ । हाङयुग–जुनिता फाउन्डेसन र इलाम साहित्य समाज सहआयोजक रहने कार्यक्रममा नेपाल तथा भारतका सयभन्दा बढी स्रष्टा–सर्जक, संगीतकर्मी, नेता, पत्रकार, अभियन्ता एकैथलोमा जुट्नेछन् ।  

पहिलो दिन कविताका दुःख सुखदेखि, पर्यटन र पर्यावरणका विभिन्न संकट र सम्भावनामाथि चर्चा हुने छ । 

पहिलो सेसनमा ‘कविता : विरासतदेखि रिल्ससम्म’ शीर्षकको छलफलमा विनोद विक्रम केसी, रमेशचन्द्र अधिकारी र समदर्शी काइँलाले चर्चा गर्ने छन् । कवि बालिका थपलियाले यो सेसन सहजीकरण गर्नेछिन् ।  

‘मुन्धुम र पर्यावरण संकट’ माथि अर्जुनबाबु माबुहाङको एकल सम्भाषण रहने छ । 

‘आख्यान उपाख्यान’  शीर्षकमा उमा सुवेदी, अमर न्यौपाने, श्याम सिंघक र केशव दाहालसँगको छलफललाई लेखक शैलेन्द्र अधिकारीले सहजीकरण गर्नेछन् ।  

‘कवितादेखि कलिउडसम्म’ शीर्षकको सेसनमा सिनेमाकर्मी/कवि उपेन्द्र सुब्बा र पत्रकार सुनिता खालिङ गफिने छन् । 

‘पर्यटनको वैभव : समृद्धिको आधार’ शीर्षकमा सुशीला सापकोटा, निरोज कट्टेल र अमिर राईसँगको छलफललाई पत्रकार गिरिराज बाँस्कोटाले सहजीकरण गर्ने छन् । पहिलो दिनको सेसनको टुंग्याउनीमा गजल साँझ हुने छ । 

दोस्रो दिनको पहिलो सेसनमा ‘शिक्षा विधेयकको सकस’ शीर्षकमा योगेन्द्र श्रेष्ठ, पूर्ण गौतम र टंक गौतमबीच छलफल चल्ने छ । यो सेसनलाई पत्रकार सटेन्द्र जवेगुले सहजीकरण गर्नेछन् ।