काठमाडौँ — शङ्खघन्टध्वनिका साथ नेपाल भारत विश्वविद्यालय प्राध्यापक सम्मेलनको उद्घाटन गरिएको छ । शनिबार समालोचक प्रा.डा. वासुदेव त्रिपाठीले काठमाडौंमा सम्मेलनको उद्घाटन गरेका हुन् ।  

प्रमुख अतिथि डा.त्रिपाठीले सम्मेलनको उद्घटनसँगै नरेन्द्रराज प्रसाई तथा इन्दिरा प्रसाईको सम्पादनमा नइ एकेडेमीद्वारा प्रकाशित ‘नेपाली भाषासाहित्यको विकासमा नेपाल तथा भारतका विश्वविद्यालयको भूमिका’नामक बृहत् ग्रन्थको पनि लोकार्पण गरे ।

समारोहमा डा.त्रिपाठीले नइबाट आफ्नै आन्तरिक साधनस्रोतमा आयोजित ऐतिहासिक तीनदिने सम्मेलनमा नै प्रकाशित उच्च प्राज्ञिक खोजपूर्ण बृहत् ग्रन्थसमेत प्रस्तुत हुनु अविस्मरणीय र ऐतिहासिक मात्र नभएर सुनमा सुगन्धको योगजस्तो हुन पुगेको बताए ।

८ सय ७२ पृष्ठ रहेको पुस्तकमा नेपाल तथा भारतका विश्वविद्यालयबारेका २५ आलेख संग्रहृत छन् । नेपाल र भारतका विश्वविद्यालयहरूमा नेपाली विषयको प्राध्यापन र अनुसन्धान कार्यमा संलग्न साधकहरूबाट नेपाली विषयको पठनपाठनको इतिहास, तिनका पाठ्यक्रम तथा अनुसन्धानको अद्यावधिक इतिवृत्त यस ग्रन्थमा समेटिएको छ ।