काठमाडौँ — नेपाल र भारतका विश्वविद्यालयका प्राध्यापकहरूको सम्मेलन शुक्रबारदेखि काठमाडौंमा सुरु भएको छ ।नेपाल तथा भारतका विश्वविद्यालयबाट नेपाली भाषासाहित्यमा विद्यावारिधि गरेका प्राध्यापकहरूको सहभागितामा सम्मेलन सुरु भएको हो ।

सम्मेलनका प्रमुख अतिथि समालोचक प्राडा वासुदेव त्रिपाठीले नेपाल तथा भारतका २७ जना प्राज्ञलाई सम्मेलनको प्रतीक चिह्न र सम्मेलनबारेका कृतिहरू प्रदान गरेर तीनदिने सम्मेलनको शुभारम्भ गरेका थिए । २०३१ सालमा प्राडा वासुदेव त्रिपाठीले नेपाली भाषासाहित्यमा विद्यावारिधि गरेका हुन्। उनकै प्राज्ञिक नेतृत्वमा यो सम्मेलन हुँदै छ ।

नेपाली भाषासाहित्यको विकास र विस्तारबारे अध्ययन हुन बाँकी पक्षहरूका साथै उच्चशिक्षाका कतिपय अनिर्णीत सवालहरूको परिपूर्तिका निम्ति नइले ‘नेपाल-भारत विश्वविद्यालय प्राध्यापक सम्मेलन’को आयोजना गर्नुपरेको कुलपति इन्दिरा प्रसाईंले बताइन्।  

सम्मेलनमा उच्च शिक्षामा नेपाली भाषासाहित्यको अध्यापन तथा अनुसन्धान गरिने भारतका १३  वटा विश्वविद्यालय र नेपालका छवटा विश्वविद्यालयका दस्तावेज प्रस्तुत गरिने छन् । सम्मेलनको पहिलो दिन सहभागी प्राज्ञहरूले आ-आफ्ना विश्वविद्यालयबारे चर्चा गरेका थिए ।