पुस्तकमा सेजनले विभिन्न समयमा विषयगत विशिष्टताका साथ प्रकाशन गरेका उनका ८ वटा गहन लेख समावेश गरिएको छ।
What you should know
काठमाडौँ — नेपाल आर्थिक पत्रकार समाज (सेजन)ले 'अर्थनीतिमा डा. स्वर्णिम वाग्लेको दृष्टि: समृद्धि, असमानता र सुधारको वर्षौदेखिका बहस' नामक पुस्तक प्रकाशन गरेको छ।
यो पुस्तकको सोमबार अर्थमन्त्री वाग्लेलले अर्थ मन्त्रालयमा विमोचन गरेका हुन्। पुस्तकमा सेजनले विभिन्न समयमा विषयगत विशिष्टताका साथ प्रकाशन गरेका उनका ८ वटा गहन लेख समावेश गरिएको छ।
अर्थमन्त्री वाग्लेले यो पुस्तकले सुधारको लागि विगतमा गरेको पैरवी स्मरण गराएको बताए। आम सरोकारवालालाई आफ्नो दृष्टिकोण बुझ्न सहयोग हुने उनको भनाइ छ। 'विगतमा उठाइएका आर्थिक सुधारका एजेण्डा पुस्तकमा समावेश छन्।
पहिले विषय विज्ञका रूपमा सुधारका लागि उठाइएका धेरै कुरा सुनिएन। अन्तत: राजनीतिमा आएर अहिले तीनै एजेण्डा कार्यान्वयन गर्ने कार्यकारी भूमिकामा छु,' अर्थमन्त्री वाग्लेले भने, 'यिनै दस्तावेजका आधारमा सुधारका कामहरू गर्ने हो ।'
पुस्तकमा २०७१ देखि २०८२ सम्मको एक दशक लामो नेपालको आर्थिक स्वरूपलाई विभिन्न आयामबाट सूक्ष्म ढङ्गले केलाइएको छ।
दक्षिण एसियाली देशहरूबीचको व्यापार लागत, संघीयताको आर्थिक सबलीकरण, मिलिभगतको पुँजीवाद (क्रोनी क्यापिटालिजम) को अन्त्य र अन्तर्राष्ट्रिय सहायताको फेरिँदो स्वरूप जस्ता गम्भीर विषयहरू पुस्तमा समेटिएका छन् ।
नेपालको उत्पादकत्व वृद्धि शून्य रहेको तीतो यथार्थलाई उजागर गर्दै अब सानातिना सुधारले मात्र नहुने र 'बिग ब्याङ रिफर्म' अर्थात् बृहत् संरचनात्मक सुधार आवश्यक रहेको तर्क उनको छ। १०० अर्ब डलरमाथिको अर्थतन्त्र पुर्याउने लक्ष्यका साथ डिजिटलाइजेसन, स्वच्छ ऊर्जा र पर्यटनलाई अर्थतन्त्रको मुख्य शक्तिका रूपमा प्रस्तुत गरेका छन् ।
सेजन अध्यक्ष भागत भट्टराईले यो पुस्तक प्रकाशन गर्नुको मुख्य उद्देश्य वर्तमान अर्थमन्त्रीको सोच र नेपालको अर्थतन्त्रलाई हेर्ने उनको दृष्टिकोणलाई आमनागरिक र सरोकारवालासम्म पुर्याउनु भएको बताए। साथै, आमपत्रकारका लागि अर्थमन्त्री वाग्लेका नीति र व्यवहारको मूल्याङ्कन गर्न पनि यो पुस्तकले सहयोग पुग्ने उनले बताए।
