चितवन — पालिकाहरूमा गठन भएका प्रजा प्रतिष्ठानका प्रमुख तथा प्रतिनिधिहरूको भेला सोमबार भरतपुरमा सुरु भएको छ । साहित्य, कला, संस्कृतिको उत्थानका लागि पालिकाहरूले गठन गरेको यस्ता प्रतिष्ठानको हालको अवस्था, समस्या र आउँदा दिनमा लिनुपर्ने नीति लगायतका विषयमा भेलामा छलफल हुने र निचोडका रूपमा भरतपुर घोषणापत्र जारी गर्ने कार्यक्रम छ ।

भरतपुर महानगरपालिकाको प्रज्ञा प्रतिष्ठानले भेला आयोजना गरेको हो । भेलाको उद्घाटन गर्दै महानगरका कार्यवाहक प्रमुख चित्रसेन अधिकारीले सिकाइ र भोगाइका बारेमा विमर्श गरेर प्रतिष्ठानलाई परिस्कृत बनाउन भेला सहयोगी हुने बताए । प्राज्ञिक कार्यमा निखार ल्याउने योजना बनाउन महानगरले सहयोग गर्ने र देशका अन्य पालिकाहरूले पनि यसबारेमा सोच्नु पर्ने उनले बताए ।

उनले भरतपुरमा आर्ट ग्यालरीसहित ‘कला ग्राम’ बनाउनका लागि महानगर १० बिघासम्म ठाउँ उपलब्ध गराउन सकारात्मक भएको र यसका बारेमा सबैले सोचेर योजना ल्याउन अपिल गरे । कार्यक्रममा बोल्दै नेपाल ललितकला प्रज्ञा प्रतिष्ठनाका उपकुलपति लालकाजी लामाले कला र साहित्यले रोजगार सिर्जनमा पनि सघाउने भएको हुँदा यसको प्रवर्द्धनमा पालिकाहरू सकारात्मक हुनुपर्ने बताए ।