झापा — ऐतिहासिक ‘भोक कविता आन्दोलन’ का अभियानी कवि प्रकाश बुढाथोकीलाई शनिबार ‘मुन्धुमी माङ्गेना सम्मान’ प्रदान गरिएको छ ।

किरात मुन्धुम प्रतिष्ठान, दमक–झापाली नेपाली कविता, साहित्यिक आन्दोलन र सामाजिक चेतनाको क्षेत्रमा उनले पुर्‍याएको योगदानको कदर गर्दै उनलाई परम्परागत किराती सांस्कृतिक विधिअनुसार सम्मान गरिएको हो ।

नेपाल प्रज्ञा–प्रतिष्ठानका सदस्य प्राज्ञ सुमित्रा बाङ्देल ‘चेली’ र मुनाराज शेर्माको उपस्थितिमा सम्मान गरिएको हो । सम्मान स्वरूप बुढाथोकीलाई शिरमा फेटा गुथाएपछि एक पेरुङ्गो फाक्सा (सुँगुरको मासु) र एक कटवा सिँजवा (रक्सी) अर्पण गरिएको थियो । 

बुढाथोकीले आफ्नो कविता यात्रा २०३४/३५ सालतिर सुरु गरेका हुन् । २०३९ सालमा कवि भवानी घिमिरेले झापामा सडक कविता क्रान्तिको अगुवाइ गरेपछि यहाँको साहित्यिक वातावरण थप सजीव बनेको थियो । घिमिरेकै सल्लाह र प्रेरणामा झापाबाट ‘भोक कविता आन्दोलन’ सुरु भयो, जसमा बुढाथोकी पनि सक्रिय रूपमा जोडिए ।