चितवन — ददि सापकोटाको किताब 'ज्ञानिका'माथि शनिबार सौराहामा विमर्श सम्पन्न भएको छ । कार्यक्रममा 'ज्ञानिका'का पाँच पात्रहरूले पाठक सामु आफ्ना कुरा राखेका थिए  ।

वन्यजन्तु प्राविधिकका रूपमा सौराहामा लामो समय काम गरेको अनुभव पुस्तकमा पस्केका विष्णु लामाले १४ वर्ष हुँदा नेपाली बोल्न सिकेको र आ‍ैपचारिक शिक्षा निकै कम भए पनि आफूले फिल्डमा बटुलेको ज्ञानले देशविदेशका धेरैलाई वन्यजीव उद्धार लगायतका विषयमा सिकाएको बताए । त्यसै गरी हर्कमान लामाले ४३ वर्ष लगातार वन्यजन्तु प्राविधिकका रूपमा काम गरेको सुनाए । डराइडराई काम सुरु गरे पनि फिल्डबाटै धेरै ज्ञान र अनुभव बटुलेको र पुस्तकमा यसैका बारेमा चर्चा गरेको उनले बताए ।

बाबुकृष्ण कार्कीले २१ जनाको अनुभव समेटिएका कारण यो पुस्तक २१ तले मन्दिरझैं बनेको धारणा राखे । रमा मिश्रले किताबका २१ पात्रमध्ये आफू कान्छी भएको बताइन् । 'संरक्षण अभियानमा महिला कम हुनुहुन्छ । जो लागेका छन् उनीहरूलाई यस्तो लेखनले हौसला दिन्छ,' उनले भनिन् । निकै दुर्लभ र चर्चामा पनि नआउने मलाहा बिरालोको अध्ययनमा आफूले निकै कष्ट बेहोरेर काम गरेपछि अहिले यो जनावरबारे धेरैले चासो र चिन्ता लिन सुरू गरेको उनले बताइन् ।