काठमाडौँ — संस्कृति अध्येता डा. शशि थापा पण्डितका तीन कृति एकैसाथ लोकार्पण गरिएको छ । थापाका ‘नेपाली कलामा कामकला’, ‘मल्लकालिक नेपालका नारीहरु’ र ‘नागार्जुन क्षेत्रको सांस्कृतिक अध्ययन’ कृतिहरु लोकार्पण गरिएको हो ।

डा. विणा पौड्यालको सभापतित्वमा भएको कार्यक्रममा इतिहासविद् दिनेशराज पन्त, प्रा.डा. पेशल दाहाल र संस्कृतिविद् डा. जगमान गुरुङले संयुक्त रुपमा ती कृतिहरुको लोकार्पण गरे । तीनवटै कृतिको रचनागर्भको चर्चा गर्दै लेखकले यी कृति प्रकाशन गर्न सहयोग गर्ने घरपरिवार, आफन्त, साथीभाइ, सहयोगी र गुरुहरुलाई धन्यवाद ज्ञापन गरिन् ।

‘मल्लकालिक नेपालका नारीहरु’ कृतिमाथि चर्चा गर्दै दिनेशराज पन्तले मल्लकालको सामाजिक, आर्थिक, धार्मिक, राजनीतिक अवस्थासहित नारीहरुको अवस्था पनि चित्रण गरेको बताए । पुस्तक निक्कै परिश्रम गरेर तयार गरिएकोले गल्तीरहित र सूचना युक्त भएको उनले बताए ।  

शुभकामनाकै क्रममा प्रा.डा. पेशल दाहालले कामकलाजस्तो समाजले नै पचाउन नसक्ने विषयमा पीएचडीको शोध गरेकोले गाइड गर्न, सामग्री उपलब्ध गराउन, निर्देशन दिन पनि सुरुमा कठिन भएको उल्लेख गरे । ‘नागार्जुन क्षेत्रको सांस्कृतिक अध्ययन’ कृतिको चर्चा गर्दै प्रा.डा. दाहालले काठमाडौँ उपत्यकाको विकासको बीजारोपण र विकासक्रममा नागार्जुन क्षेत्रको चर्चा पाइने बताए । यो क्षेत्रमा धेरै ऐतिहासिक र सांस्कृतिक अभिलेख र प्रमाणहरु भएको उनको भनाइ छ । सात अध्यायमा समेटिएको पुस्तकमा त्यहाँको कला, संस्कृति, चाडपर्व, मठमन्दिरहरु, चलनहरु, धार्मिक आस्थाहरु आदि सम्पूर्ण कुरा उजागर भएको उनले बताए ।