वीरगन्ज — मिथिला क्षेत्रमा विवाह संस्कारको आफ्नै संस्कृति र पहिचान छ । चार दिनसम्म चल्ने यो विवाह परम्परालाई लिपिबद्ध गर्दै लेखिएको पुस्तक 'मिथिला मे विवाह संस्कारक विशिष्ट परम्परा' को वीरगन्जमा आयोजित एक भव्य कार्यक्रमबीच विमोचन गरिएको छ । 

पूर्वमन्त्री लक्ष्मणलाल कर्णको प्रमुख आतिथ्यमा उक्त पुस्तकको विमोचन गरिएको छ । यस पुस्तक विमोचन समारोहलाई सम्बोधित गर्दै पूर्वमन्त्री कर्णले मिथिला विवाह परम्पराबारे लेखिएको यो पुस्तक आउँदो पुस्ताको लागि ग्रन्थ सरह भएको बताएका छन् । 

उनले मिथिला क्षेत्रमा विवाह सम्बन्धी रीति रिवाजबारे अनेकौं पुस्तक भए पनि केटा पक्ष र केटी पक्षबीच बिहेको कुराकानी सुरु भएको दिन देखि चार दिनसम्म चल्ने बिहे समारोहको पुरै परम्पराबारे र बिदाइ पछि केटा पक्षको घरमा चल्ने एक एक रीतिरिवाज बारे विस्तारपूर्वक लेखिएको मिथिलाको ग्रन्थ रहेको बताएका छन् । 

यस पुस्तककी लेखिका वीरगन्जकी प्रसिद्ध समाजसेवी महिला उद्यमी श्रीमती चञ्चला राजले यो पुस्तकबारे प्रकाश पार्दै मिथिला क्षेत्रमा हुने विशिष्ट विवाह परम्पराबारे सूक्ष्म तरिकाले जानकारी दिनुको साथै हरेक परम्पराको सामाजिक र वैज्ञानिक महत्त्वबारे जानकारी दिइएको बताइन् । 

पाँच वर्ष लगाएर मिथिलाको हरेक क्षेत्रमा हुने मौलिक परम्परा र रीतिरिवाजलाई समेट्दै यो पुस्तक तयार पारिएको लेखिका चञ्चला राजले आउने समयमा मिथिला क्षेत्रको विवाह समारोहमा यो पुस्तकको अत्यन्त महत्त्व हुने र यो विवाहको लागि एउटा अनिवार्य कुरा हुने बताएकी छन् । 

मिथिला क्षेत्रमा हुने विवाह समारोहमा सानो सानो विधि व्यवहार परम्परा र रीतिरिवाजबारे प्रायजसो विवाह गराउने पुरोहित र समाजका वयोवृद्धबीच वादविवाद हुने गरेको र कहिलेकाहीँ यही कारणले विवाह समारोहमा ठूलो विवाद पनि आउने गरेको बताउँदै लेखिका चञ्चला राजले अब यो पुस्तक आएपछि यस्ता समस्या नआउने र मिथिला क्षेत्रमा मान्यजन र विद्वतजनहरुले मान्यता दिएका कारण यो पुस्तक विवाहको विधान जस्तै बन्ने आफूले अपेक्षा लिएको बताएकी छन् ।