काठमाडौँ — नेपाली साहित्यका धरोहरद्वय इन्द्रबहादुर राई र मोहनराज शर्माका दुई किताब पुनर्मुद्रण भएर बजारमा आएका छन् । राईको कथा–किताब ‘विपना कतिपय’ र मोहनराज शर्माको विसं २०४२ मा मदन पुरस्कारप्राप्त नाटक ‘वैकुण्ठ एक्सप्रेस’लाई इम्प्रिन्ट पब्लिसर्सले बजारमा ल्याएको हो । 

मदन पुरस्कार पाएको हालसम्मको एकमात्रै नाट्य–किताब हो– ‘वैकुण्ठ एक्सप्रेस’ । ‘अभिव्यञ्जनावादी प्रयोगात्मक शिल्पमा संरचित नाटक वैकुण्ठ एक्सप्रेस नाटककार मोहनराज शर्माको एउटा उत्कृष्ट कृति हो,’ कथाकार, नाटककार, सम्पादक अविनाश श्रेष्ठ भन्छन्, ‘तर, अहिलेसम्म यो नाटकमाथि नेपाली रंगकर्मीहरूको सुदृष्टि नपर्नु र यस्तो सशक्त नाटकको एकपटक पनि मञ्चन नहुनु भने विडम्बनापूर्ण छ ।’ आफ्नै किताबमाथि मोहनराज शर्माले लेखेका छन्, ‘यो नाटक भित्री तहमा त्रासद छ, तर बाहिरिया तहमा चाहिँ हास्यपूर्ण र मनोरञ्जनात्मक छ ।’