कोलोराडो — संगीतकार, गायक तथा लेखक हिरण्य भोजपुरेको उपन्यास 'सगरमाथाभन्दा माथि'को अंग्रेजी अनुवाद 'आङ शेर्पा एन्ड ओसन अफ हाइट्स' सार्वजनिक भएको छ । अमेरिकाको कोलोराडोमा पुस्तक विमोचन गरिएको हो ।
कवि युयुत्सु आरडी शर्मा, लेखक भोजपुरेकी पत्नी उर्मिला श्रेष्ठ लगायतले संयुक्त रूपमा पुस्तक विमोचन गरे । हालै दिवंगत संगीतकार, गायक तथा लेखक गणेश रसिकको स्मृतिमा विमोचन कार्यक्रम समर्पित गरिएको थियो ।कवि शर्माले उपन्यासले स्थानीय पर्वतारोहीहरूको अनसुना आवाजलाई बुलन्द गरेको भन्दै प्रशंसा गरे। उनले भने, 'आङ शेर्पा एक शक्तिशाली र लामो समयदेखि प्रतीक्षित उपन्यास हो ।'
लेखक भोजपुरेले उपन्यासको नायक आङ छत्रे शेर्पाको बारेमा प्रकाश पार्दै उनको कथा साझा गरे । सगरमाथाको काखमा अवस्थित पाङबोचे गाउँका बासिन्दा आङ छत्रेको जीवनलाई उपन्यासले जीवन्त रूपमा चित्रण गरेको छ । भोजपुरेले लुक्ला कहिल्यै नपुगे पनि उनको उपन्यासले लुक्ला, सगरमाथा आधार शिविर, साउथ कोल र सगरमाथाको चुचुरोलाई साहित्यिक सटीकताका साथ प्रस्तुत गरेको छ। उपन्यासमा आङ सगरमाथाको दसपटक सफल आरोहण गर्छन्। तर, साउथ कोलमा भएको नाटकीय घटनापछि उनलाई आरोहणमा प्रतिबन्ध लगाइन्छ र अस्ट्रेलियामा निर्वासित गरिन्छ । कथाले उनको निर्वासन, नेपाल फिर्ता र विश्वको सर्वोच्च शिखरबाट टाढा रहेको जीवनसँग जुध्ने आन्तरिक यात्रालाई मार्मिक र मानवीय शैलीमा प्रस्तुत गर्छ ।
भोजपुरको देउरालीमा जन्मिएका भोजपुरे १९६० को दशकमा लोकाली सांगीतिक आन्दोलनका संस्थापक सदस्य हुन् । उनले लोक, आधुनिक र प्रयोगवादी गीत सिर्जना गरेका छन् । कवि भुवन थपलियाद्वारा अनुदित उनको यो उपन्यास नयाँ दिल्लीको निराला पब्लिकेसन्सले प्रकाशन गरेको हो ।
