काठमाडौँ — बौद्ध दर्शनमा आधारित शैलेन्द्र अधिकारीको उपन्यास 'अर्हत्' परिसंवादमा वक्ताहरूले बुद्ध बुद्धत्वको खोजीमा निस्किएझैं लेखक बुद्धको खोजीमा निस्किएको बताएका छन् । 

शनिबार राजधानीमा भएको कार्यक्रममा बोल्दै समालोचक राजकुमार बानियाँले २०८१ सालमा प्रकाशित उपन्यास  अर्हत् अद्योपत पढ्नैपर्ने किताब रहेको उल्लेख गरे । त्यस्तै, पत्रकार दीपक सापकोटाले बुद्धले आफ्नो जीवनमा तनाव पाएको र त्यसको बाबजुद उनले अर्हत् प्राप्त गरेको बताए । 'बुद्ध बुद्धत्वको खोजीमा थिए, अर्हत्‌का लेखक बुद्धको खोजीमा छन्, बुद्ध चिन्न किताबले सघाउँछ,' उनले भने, 'काँडाको बाटोमा फूल कसरी फुल्छ ? थाहा पाउन यो पुस्तक पढ्नैपर्छ ।' 

लेखक भुवनहरि सिग्देलले बुद्ध बनेर, बुद्ध पात्र भएर लेख्दा भित्रै प्रवेश गर्नुपर्ने बताए । उनले थपे, 'यो किताब बुद्धको आत्मकथा हो ।'