विराटनगर — परिवर्तन थिएटर झापाले तयार पारेको नाटक ‘त्यो फेरि फर्कला ?’ भारत राजिस्थानको अन्तर्राष्ट्रिय नाट्य महोत्सवमा मञ्चन हुने भएको छ । भवानी भिक्षुले लेखेको नाटकलाई नाट्यकर्मी कविता नेपालको परिकल्पना र निर्देशन गरेकी छन् ।  राजस्थानमा जारी ‘अलवर रंग महोत्सव’मा माघ २१ गते नाटक मञ्चन हुनेछ । 

राजस्थानको रंग संस्कार थिएटर ग्रुपद्वारा आयोजित १०० दिने नाट्य महोत्सव गत  डिसेम्बर १८ बाट सुरु भएको थियो । यो महोत्सव मार्च २७ सम्म चल्नेछ । यो अवधिमा १०० भन्दा बढी नाटक मञ्चन हुने आयोजकले जनाएको छ । 

महोत्सवमा भारतसहित नेपाल, स्पेनका नाट्य समूहहरूको विशेष सहभागिता रहेको छ । यसअघि पनि यो नाटक भारतको उडिसा, कोलकाता र नेपालकै विभिन्न स्थानमा मञ्चन भइसकेको छ । ‘त्यो फेरि फर्कला ?’ नाटकले नेपाली कला, संस्कार, संस्कृति र यथार्थतालाई प्रस्तुत गर्दछ । नाटकमा पहाडी गाउँको कथा, गाउँ छोडेर सहर झर्ने मानिसहरूको दुःख र संघर्षलाई मार्मिक ढंगले उतारिएको छ । नेपाली जीवनशैली झल्काउने यो नाटकले अन्तर्राष्ट्रिय दर्शकहरूलाई नेपालीपनको अनुभूति दिने विश्वास गरिएको छ।