काठमाडौँ — देश दुनियाँका विविध आयामहरूमाथि हुने बहस कार्यक्रम ‘चित्तौन कचेहेरी’ नारायणगढ नारायणी कला मन्दिरमा शुक्रबार र शनिबार हुँदैछ । ‘चित्तौन कचेहेरी’को यो दोस्रो संस्करण हो । 

यसअघि २०८० सालको वैशाख २९ र ३० मा कला मन्दिरमै ‘चित्तौन कचेहेरी’ भएको थियो । यो पटक कचेहेरीमा बहस गर्न स्वदेशी विज्ञ, अभियन्तासँगै भारत र पाकिस्तानबाट पनि अतिथिहरू आउने आयोजकले बताएका छन् ।

‘चित्तौन कचेहेरी’को उद्घाटनमा पाकिस्तानका वैज्ञानिक, लेखक, बौद्धिक अगुवा डा.परवेज हुडबो प्रमुख वक्ता रहने आयोजक समितिका निर्देशक सरिता तिवारीले जानकारी दिइन् । त्यसैगरी भारतबाट लेखक हर्ष मन्दर पनि ‘चित्तौन कचेहेरी’को बहसमा भाग दिन आउने उनले बताइन् । ‘पहिलो चित्तौन कचेहेरी चितवनको बस्ती विकास र विकासक्रममा किनारा लगाइएका आदिवासीको मुद्दामा केन्द्रित थियो,’ तिवारीले भनिन् ।