काठमाडौँ — पेटको बोसो अर्थात् बेली फ्याटले धेरैलाई सताउने गरेको छ । यो केवल बाहिरी सौन्दर्यको समस्या मात्र नभई स्वास्थ्यका लागि पनि गम्भीर चुनौती हो ।

योग प्रशिक्षक निरु भट्टराईको अनुसार योगसँगै सन्तुलित आहार र नियमित शारीरिक गतिविधिबाट बेली फ्याट घटाउन सकिन्छ । तनाव व्यवस्थापन, पर्याप्त निन्द्रा र अस्वस्थ खानपानबाट टाढा रहनु पनि उत्तिकै महत्वपूर्ण हुने उनी जिकिर गर्छिन् ।

बेली फ्याटले उच्च रक्तचाप, मधुमेह, मुटु रोग, कलेजो, किड्नी र आन्द्रासम्बन्धी रोगको जोखिम बढाउँछ । तर, नियमित योगासन, स्वस्थ खानपान र जीवनशैलीमा सुधार ल्याएर यो समस्यालाई नियन्त्रण गर्न सकिन्छ । बेली फ्याट घटाउन चाहनेहरूले आफ्नो स्वास्थ्य अवस्थालाई ध्यानमा राखेर योग प्रशिक्षकको सल्लाहमा योग अभ्यास गर्नुपर्ने सुझाव दिन्छिन् । दीर्घकालीन रोग छ भने चिकित्सकको परामर्श लिनु उपयुक्त हुने उनी बताउँछिन् ।

बेली फ्याट कसरी बन्छ ? 
विशेषज्ञहरूका अनुसार अस्वस्थ खानपान, शारीरिक व्यायामको कमी, तनाव र स्वास्थ्य समस्याहरू बेली फ्याट बढ्ने मुख्य कारण हुन् । शरीरलाई आवश्यकभन्दा बढी क्यालोरी ग्रहण गर्दा यो बोसो पेट वरिपरि जम्न थाल्छ ।

स्वास्थ्य जोखिम
बेली फ्याटले पेट वरपरका अंगहरूलाई प्रभावित गर्छ । यसले दीर्घकालीन स्वास्थ्य समस्याहरू जस्तै मधुमेह, उच्च रक्तचाप, मुटु रोग र क्यान्सरको जोखिम बढाउँछ । त्यसैले समयमै यो बोसो घटाउनु जरुरी छ ।