सुर्खेत — दैलेखको कर्णाली नदीमा खसेको मिनी बस दुर्घटनाको चार दिन बितिसक्दा पनि दुर्घटनाग्रस्त गाडी फेला परेको छैन । कर्णालीमा यतिखेर उच्च पानीको बहाव र धमिलो नदीका कारण खोजी कार्य प्रभावित भएको छ ।

सुर्खेतबाट कालीकोटको रास्कोटतर्फ जाँदै गरेको कर्णाली प्रदेश–०२–००१ ख १०५५ नम्बरको मिनी बस (फोर्स) बिहीबार बिहान करिब ११ः३० बजे दैलेखको चामुण्डाबिन्द्रासैनी नगरपालिका–७ साँगेतडा सडकबाट कर्णाली नदीमा खसेको थियो । आइतबारसम्म पनि गाडीको अवस्था र त्यसमा सवार यात्रुको यकिन विवरण खुल्न सकेको छैन ।

दैलेख दुर्घटनामा हेलिकप्टरबाट बेपत्ताको खोजी गर्न मुख्यमन्त्री कँडेलको निर्देशन

कर्णाली प्रदेश प्रहरी कार्यालयका प्रमुख डीआईजी जयराज सापकोटाले नदीमा अत्यधिक बहाव र धमिलो पानीका कारण खोजी कार्य चुनौतीपूर्ण बनेको बताए । उनका अनुसार हालसम्म दुर्घटनास्थलदेखि तलका सम्भावित क्षेत्रमा नियमित खोजी भइरहे पनि गाडी फेला परेको छैन । ‘अहिलेसम्म गाडी फेला परेको छैन । कति जना सवार थिए भन्ने पनि यकिन हुन सकेको छैन,’ उनले भने, ‘सबै सुरक्षा निकायका प्रमुखहरु टोलीसहित कर्णाली नदीका विभिन्न स्थानमा खोजी कार्यमा खटिएका छौं ।'

उनका अनुसार यातायात कम्पनीको अभिलेखमा पाँच जनाले मात्र टिकट काटेको देखिन्छ । तर बीच बाटोबाट पनि यात्रु चढेको हुन सक्ने अनुमान सुरक्षाकर्मीले गरेका छन् । बाटोका प्रहरी चौकीमा समेत गाडीको इन्ट्री रेकर्ड भेटिएको छैन ।

दुर्घटनापछि भीरमा अड्किएको अवस्थामा एक जनाको शव फेला परेको प्रहरीले जनाएको छ । शवको सनाखत भइसकेको भए पनि अन्य यात्रुको अवस्था अज्ञात छ ।