सुर्खेत — कर्णाली प्रदेशका मुख्यमन्त्री यामलाल कँडेलले दैलेखको चामुण्डा विद्रासैन्नीस्थित कर्णाली राजमार्गबाट बिहीबार नदीमा खसेर बेपत्ता भएको गाडी तथा यात्रुको खोजीकार्यलाई थप प्रभावकारी बनाउन आवश्यक परे हेलिकप्टरसमेत परिचालन गर्न निर्देशन दिएका छन्।

मुख्यमन्त्री कँडेलले शुक्रबार कर्णाली प्रदेशमा रहेका चारवटै सुरक्षा निकायका प्रमुखसँग दुर्घटनापछि भइरहेको खोज तथा उद्धार कार्यबारे जानकारी लिँदै उपलब्ध सबै साधन–स्रोत परिचालन गर्ने गरी खोजीलाई तीव्र बनाउन आग्रह गरेका हुन् । छलफलमा मुख्यमन्त्री कँडेलले अहिलेसम्म सुरक्षा निकायहरूबाट खोजी तथा उद्धार कार्यमा भइरहेको कामको प्रशंसा गर्दै आवश्यक परे हेलिकप्टरबाटसमेत प्रयोग गर्नुपर्नेमा जोड दिए । उनले दैलेखदेखि भारतको सीमासम्म खोजी दायरा विस्तार गर्नसमेत निर्देशन दिएका छन्।

छलफल कार्यक्रममा सशस्त्र प्रहरीका डीआईजी कृष्णराज पाठकले घटनास्थलमा गोताखोर परिचालन गरिएको र थप जनशक्ति कुरिनटारबाट हिँडिसकेको जानकारी गराएका थिए । नेपाल प्रहरीका डीआईजी जयराज सापकोटाले नदीमा पानी धमिलो भएको, नदीको गहिराइ बढी हुनु तथा भौगोलिक कठिनाइका कारण खोजीकार्यमा चुनौती थपिएको बताए । उनले सबै सुरक्षा निकायको सामूहिक प्रयासबाट उपलब्ध सम्पूर्ण जनशक्ति र स्रोत–साधन परिचालन गरी खोजी जारी राखिएको जानकारी दिए। खोजीकार्यमा नेपाली सेनासमेत परिचालन भएको र ड्रोन क्यामेराबाट सम्भावित स्थानहरूमा खोजी सुरू भएको सो अवसरमा जानकारी दिइएको थियो ।