सुर्खेत — कर्णाली प्रदेशसभा सचिवालयका सचिव जीवराज बुढाथोकीले आफ्नै श्रीमतीलाई निजी सचिव राखेको पाइएको छ । सचिव बुढाथोकी प्रदेश सभा सचिवालयमा नियुत्ति भएयता उनले श्रीमतीलाई निजी सचिवमा राखेर २५ लाख पाँचसय ६० रुपैया बुझेको पाइएको छ ।

श्रीमती रुक्मीना बुढाथोकीको नाममा मासिक ३४ हजार ७ सय ३० रुपैयाँ तलब भुक्तानी हुने गरेको प्रदेश सभा सचिवालयले जानकारी दिएको छ ।

‘रुक्मीना बुढाथोकी नै सचिवज्यूको निजी सचिव हो भन्ने छ, सचिवालयका एक कर्मचारीले भने, उहाँको  हाजिर कहाँ हुन्छ, को हुनुहुन्छ थाह छैन, सचिवज्यूले बैंक खाता दिनु भएको त्यहीमा जान्छ ।’ 

यस विषयमा बुढाथोकीसँग कुरा गर्दा श्रीमतीलाई निजी स्वकीयका रुपमा नियुक्त दिएको स्वीकारेका छन् । ‘बाहिर भनेजस्तो विधिविपरीत नियुक्त गरिएको होइन । कानुनले दिएको अधिकार प्रयोग गरिएको छ,’ उनले भने । 

६५ वर्ष उमेर पुग्दा पनि पद छोड्न मान्दैनन् प्रदेश सचिव बुढाथोकी

उनका अनुसार नियुक्ति भएयता दुई वर्षको अवधिमा रुक्मीनाको हाजिरी नियमित रहेको छ । उनले कान्तिपुरलाई उपलब्ध गराएको हाजिरी कापीमा चैत्र ३ गतेसम्मको हाजिरी रहेको छ । 

तपाईंको स्वकीय सचिव त हाजिरी नै नगरी तलब बुझ्नुहुन्छ भन्ने प्रश्न उठेको छ नि? भन्ने कान्तिपुरको प्रश्नमा उनी भन्छन्, ‘त्यो भ्रम हो । मैले उपलब्ध गराएको हाजिरी कापी हेर्नुहोस् । थाहा भइहाल्छ नि ।’