डोल्पा — उपल्लो डोल्पामा पर्ने मोरिम्ला नाकामा चिनियाँ प्रहरीसहित तीन सुरक्षा निकायको संयुक्त गस्ती सुरु गरिएको छ ।

गत साउन २५ गतेदेखि बीस दिनका लागि खुला गरिएको यस परम्परागत नाकामा हुने अवैध गतिविधि रोक्न चिनियाँ प्रहरी,सशस्त्र प्रहरी र नेपाल प्रहरीले संयुक्त गस्ती सुरु गरेको हो ।

नाका क्षेत्रमा अवैध गतिविधि रोक्नुका साथै शान्ति सुरक्षा कायम गर्न संयुक्त गस्ती सुरु गरिएको जिल्ला प्रहरी कार्यालय डोल्पाका प्रहरी नायब उपरीक्षक रुकबहादुर खड्काले बताए ।

'यो खुला नाका हो । यस समयमा अस्थायी रुपमा नाका खुला छ । मान्छेहरुको आवागमन पनि बाग्लो हुने भएका विभिन्न प्रकारका अपराधिक गतिविधि नहुन भनेर सुरक्षाकर्मीले गस्तीसहित निगरानी गरिरहेको छ,' डिएसपी खड्काले भने ।

जिल्ला प्रशासन कार्यालय डोल्पाले यस वर्ष दुई हजार दुई सय सीमा पास जारी गरेको प्रमुख जिल्ला अधिकारी रोमबहादुर महतले जानकारी दिए ।

विगतदेखि नै खुल्दै आएको मोरिम्ला नाकाबाट उपल्लो डोल्पावासीले दैनिक उपभोग्य सामग्री,लत्ताकपडा,विभिन्न मेसिनरी सामग्री खरिद गर्ने गरेका छन् ।

उपल्लो डोल्पा भौगोलिक रुपमा विकट भएकाले नेपाली सामानहरु खरिद गर्दा ढुवानी रकम महँगो पर्ने भएकाले उपल्लो डोल्पावासीले वर्ष दिनसम्मै पुग्ने गरी सस्तो मूल्यमा चिनियाँ सामग्रीहरु खरिद गर्ने गरेका हुन् ।