पर्सा — वीरगन्जस्थित दृष्टि आँखा तथा नाक, कान, घाँटी अस्पतालमा बिहीबार एक बिरामीको सफलतापूर्वक आँखाको नानी प्रत्यारोपण गरिएको छ । 

लामो समयदेखि दुवै आँखाका नानीमा गम्भीर समस्याका कारण दृष्टिविहीन रहेका पर्सा जिराभवानी गाउँपालिकाका ६१ वर्षीय राजदेव रामको आँखामा कोर्निया विशेषज्ञ चिकित्सकहरुको टोलीले नानी प्रत्यारोपण गरेको हो । प्रत्यारोपणपछि बिरामीको अवस्था सन्तोषजनक रहेको अस्पताल स्रोतले जनाएको छ । 

अस्पतालका प्रमुख कोर्निया रोग विशेषज्ञ डा. भाइराजा श्रेष्ठको नेतृत्वमा अस्पतालमा नानी प्रत्यारोपण सेवा सुरु गरिएको अस्पतालका संचालक अध्यक्ष विश्वराज गौतमले जानकारी दिएका छन् । उनले आँखाको नानी प्रत्यारोपण दृष्टि पुनःस्थापनाका लागि प्रभावकारी उपचार विधि रहेको र समयमै उपचार गरिएमा बिरामीले पुनः दृष्टि पाउने उच्च सम्भावना रहने बताए ।