तनहुँ — पृथ्वीराजमार्ग विस्तारसँगै बढ्दो सवारी दुर्घटनालाई न्यूनीकरण गर्न तनहुँ खण्डमा जोखिमयुक्त स्थान पहिचान गरिने भएको छ ।

राजमार्ग विस्तारसँगै बढेको सडक दुर्घटना संख्याका आधारमा पाँच प्रमुख जोखिमयुक्त स्थानको पहिचान गर्न लागिएको प्रमुख जिल्ला अधिकारी रामकृष्ण अधिकारीले जानकारी दिए ।‘विस्तारका क्रममा रहेको मुग्लिन पोखरा सडकका कारण तनहुँ खण्डमा दुर्घटना बढेकाले दुर्घटना न्यूनीकरणका लागि पाँच प्रमुख जोखिमयुक्त स्थान पहिचान गर्न लागिएको हो,’ उनले भने ।

जिल्ला प्रशासन कार्यालय तनहुँमा राजमार्ग सुरक्षा तथा अवरोध हटाउने जिल्ला समन्वय समितिको बैठकले जिल्ला ट्राफिक प्रहरी कार्यालयको समन्वयमा जोखिमयुक्त स्थान पहिचान गरी प्राविधिक पक्षको अध्ययन गरी सुधारका आवश्यक उपायहरु अवलम्बन गर्न मुग्लिन–पोखरा सडक विस्तार आयोजना (पूर्वी) र (पश्चिम) खण्डलाई निर्देशन दिइएको प्रजिअ अधिकारीले बताए । उनका अनुसार राजमार्गमा हुने अवरोध समन्वयात्मक रुपमा हटाउन जिल्ला प्रशासन कार्यालय तनहुँबाट तर्जुमा भएको राजमार्गमा हुने अवरोध हटाउने समूह रोष्टरसहितको कार्ययोजना २०८२ स्वीकृत गरिएको छ ।

उनले भने, ‘पृथ्वीराजमार्गको तनहुँ खण्डमा पर्ने बढी दुर्घटनाग्रस्त क्षेत्रहरुको तुलनात्मक अवस्थाको विश्लेषण गरी सरोकारवालाहरुको सुझाव अनुसार दुर्घटना न्यूनीकरणका लागि आवश्यक पहल गर्ने निर्णय गरिएको छ ।’

हाल देशभर मनसुनी वायुको प्रभावका कारण मध्यमदेखि भारी वर्षा भइरहेको र आगामी दिनमासमेत वर्षाको सम्भावना रहेकाले पृथ्वीराजमार्गका विभिन्न खण्डहरुमा पहिरोलगायतका जोखिम रहेको जनाइएको छ । यस खण्डका अधिकांश भागमा चार लेन सडक सञ्चालनमा आए पश्चात् सवारी दुर्घटना उल्लेख्य रुपमा बढ्दै गएको र यस्ता दुर्घटना सडकका निश्चित स्थानहरुमा बढी मात्रामा हुने गरेकोले समस्याको अल्पकालिन एवं दीर्घकालीन समाधान खोज्नुपर्ने देखिएको प्रजिअ अधिकारीले उल्लेख गरे ।

यसैबीच जिल्ला प्रशासन कार्यालय तनहुँले रातको समयमा अत्यावश्यक बाहेक यात्रा नगर्न र गर्नैपरेमा नजिकको ट्राफिक प्रहरी र सुरक्षा निकायसँग समन्वय गरेर यात्रा गर्न अनुरोध गरेको छ । वर्षातको समय भएकाले कार्यालयले आवश्यक सुरक्षा सतर्कता अपनाएर मात्रै रातिमा यात्रा गर्न सबैमा आग्रह गरेको छ ।

कार्यालयका प्रशासकीय अधिकृत विकास श्रेष्ठले बुधबार सूचना जारी गरी पृथ्वीराजमार्ग, डुम्रे बेसीसहर सडकखण्ड लगायत स्थानीय ग्रामीण सडकमा सवारी साधन चलाउँदा उच्च सतर्कता अपनाउन, सवारी साधन चलाउँदा तोकिएको गतिभन्दा बढी गतिमा नचलाउन, वर्षातको समयमा बाढी पहिरो लगायतका कारण सडकमा अवरोध हुन सक्ने भएकाले आफू पुग्ने गन्तव्यसम्मको बाटोको अवस्था बुझेर यात्रा गर्न अनुरोध गरेका छन् ।

यस्तै, आँबुखैरेनी गाउँपालिका–२ ऐनापहरा सडक खण्डमा दुर्घटना न्यूनीकरणका लागि जिल्ला प्रशासन कार्यालय तनहुँले पहल थालेको छ । ऐनापहरा पार्कको पार्किङस्थलबाट ब्याक भएर गत आइतबार बस दुर्घटना भएपछि निकट भविष्यमा दुर्घटना नहोस् भन्नका लागि कार्यालयले पहल थालेको हो ।

‘पर्यटकीयस्थल ऐनापहराको पार्किङस्थल सडकभन्दा अग्लो स्थानमा रहेकाले सवारी साधनहरु कतिपय अवस्थामा आफै पछाडि हट्न सक्ने सम्भावना देखिएको छ’, उनले भने, ‘उक्त पार्किङस्थल सडक भन्दा होचो बनाई सम्भावित दुर्घटना न्यून गर्न सम्बन्धित पालिकालाई व्यवस्थापन मिलाउन निर्देशन दिइएको छ ।’