काठमाडौँ — राष्ट्रिय स्वतन्त्र पार्टीले शनिबार काठमाडौं उपत्यकाकेन्द्रित चुनावी अभियान ‘रोड शो’ सञ्चालन गरेको छ । रास्वपा सभापति रवि लामिछाने र वरिष्ठ नेता बालेन्द्र शाहको नेतृत्वमा काठमाडौंका १० निर्वाचन क्षेत्रसहित भक्तपुर र ललितपुर लक्षित निर्वाचन कार्यक्रम भएका हुन् । 

रास्वपाले प्रतिनिधिसभा निर्वाचनलाई लक्षित गर्दै काठमाडौं उपत्यकामा जनसम्पर्क तथा ‘घण्टी अभियान’ सुरु गरेको हो । शनिबार बिहान ६ः३० बजे पशुपतिनाथ मन्दिरबाट सुरु भएको उक्त अभियान चावहिल, जोरपाटी, सुन्दरीजल हुँदै साँखु पुगेको थियो । काठमाडौं–२ बाट सुरु भएको चुनावी कार्यक्रम क्षेत्र नं. ३ हुँदै मुख्य सडक तथा चोकहरूमा र्‍यालीसहित पुगेको थियो । काठमाडौं–३ को जोरपाटीमा ठूलो संख्यामा समर्थक रास्वपाका लामिछाने र शाहलाई पर्खेर बसेका थिए । 

मतदातालाई अभिवादन गर्दै उनीहरू सुन्दरीजल हुँदै साँखु निस्केका थिए । साँखुबाट मूलपानी, पेप्सीकोला, सानो ठिमी पुगेको थियो । त्यसपछि दुवाकोट पुगेर व्यासी, च्यामासिङ, जगाती हुँदै सूर्यविनायकबाट गुन्डुसम्म पुगेको थियो । उक्त ‘रोड शो’ नयाँ ठिमी, जडीबुटी, ग्वार्को, लुभु, बाँडेगाउँ, चापागाउँ हुँदै बुङमती र खोकनासम्म पुगेको थियो । खोकनाबाट सातदोबाटो, लगनखेल हुँदै जावलाखेल, थापाथली हुँदै कालीमाटीमा पुगेको थियो । कालीमाटीबाट बल्खु, कीर्तिपुर, सतुंगल, चन्द्रागिरि, बाँडभन्ज्याङ हुँदै सीतापाइला पुगेको थियो । सीतापाइलाबाट स्वयम्भू, बालाजु, माछापोखरी, शेषमती, फुटुङ हुँदै झोरसम्म पुगेको थियो । 

एमाले अध्यक्ष केपी शर्मा ओलीले यतिबेला आफ्नो निर्वाचन क्षेत्र झापा–५ मा चुनावी अभियानलाई तीव्रता दिादै घरदैलो कार्यक्रम सक्रिय पारेका छन् । कांग्रेसका सभापति गगनकुमार थापाले शनिबार मधेश प्रदेशका चार जिल्लाका चुनावी सभामा सम्बोधन गरेका छन् ।त्यसपछि टोखा, बूढानीलकण्ठ, कपन, सुकेधारा, विशालनगर, बालुवाटार हुँदै मैतीदेवी पुगेको थियो । त्यसपछि ठमेल, न्युरोड, हात्तीसार, पुतलीसडक, माइतीघर, नयाँ बानेश्वर हुँदै पुरानो बानेश्वर पुगेको थियो । त्यहाँबाट ‘रोड शो’ लैनचौर, सामाखुशी, गोंगबु, नयाँ बसपार्क हुँदै बेलुका पार्टी कार्यालय घण्टीघर पुगेर टुंगिएको थियो । उनीहरूले काठमाडौं मात्र नभई ललितपुर र भक्तपुरका मुख्य सहरमा पनि चुनावी ‘रोड शो’ गरेका थिए । भक्तपुर–२ मा पुगेर उनीहरूले मतदातालाई आफूतिर आकर्षित गर्ने कोसिस गरेका थिए । 

रास्वपाकी सहप्रवक्ता प्रतिभा रावलले शनिबार सम्बोधनका कुनै पनि कार्यक्रम नभएको र उपत्यकाका महत्त्वपूर्ण स्थानमा ‘रोड शो’ मात्र भएको बताइन् । काठमाडौंका १० निर्वाचन क्षेत्र, भक्तपुर र ललितपुरका उम्मेदवार र मतदातालाई हौसला बढाउन ‘रोड शो’ सञ्चालन गरिएको उनले बताइन् । रास्वपाका तर्फबाट काठमाडौं–१ मा रञ्जु न्यौपानेसहित १० नं. क्षेत्रसम्म क्रमशः सुनील केसी, राजुनाथ पाण्डे, पुकार बम, सस्मित पोखरेल, शिशिर खनाल, गणेश पराजुली, विराजभक्त श्रेष्ठ, डोलप्रसाद अर्याल र प्रदीप विष्ट उम्मेदवार छन् । 

२०७९ को प्रतिनिधिसभा निर्वाचनमा रास्वपाले काठमाडौंको ६, ७ र ८ नम्बर क्षेत्रमा जित हात पारेको थियो । यस पटक यी क्षेत्रसहित अन्य क्षेत्रमा पनि जित्ने रणनीतिका साथ रास्वपाले चुनावी अभियान सुरु गरेको हो । ललितपुरका ३ वटा निर्वाचन क्षेत्रमा भने तोसिमा कार्की, जगदीश खरेल र बुद्धरत्न महर्जन उम्मेदवार छन् । रास्वपाले अघिल्लो पटक ललितपुर–३ मा मात्र जित हात पारेको थियो । २१ फागुनका लागि तोकिएको निर्वाचनको प्रचारप्रसार अन्तिमतिर पुग्दै गर्दा रास्वपाले शनिबार आफ्नो शक्ति प्रदर्शनका लागि ‘रोड शो’ गरेको देखिन्छ । बालेन्द्र आइतबार आफ्नो निर्वाचन क्षेत्र झापा–५ मा फर्कने भएकाले शनिबार रास्वपाले बृहत् ‘रोड शो’ गरेको हो । 

झापा–५ मा ओलीको घरदैलो

एमाले अध्यक्ष केपी शर्मा ओलीले यतिबेला आफ्नो निर्वाचन क्षेत्र झापा–५ मा चुनावी अभियानलाई तीव्रता दिँदै घरदैलो कार्यक्रम सक्रिय पारेका छन् । अघिल्लो शनिबार झापा पुगेका ओली यतिबेला निरन्तर भेटघाट, छलफल र चुनावी सभामा व्यस्त छन् । उनको सचिवालयका अनुसार एक साता अवधिमा शनिबारसम्म उनले आधा दर्जनभन्दा बढी चुनावी सभा तथा अन्तरक्रियात्मक कार्यक्रममा सहभागिता जनाए । वडा नं. ४ अन्तर्गत पर्ने कञ्चनजंघा टोल, ताराबारी डिपु र आदर्श मंगल टोलमा पुगेर उनले स्थानीय कार्यकर्ता तथा मतदातासँग प्रत्यक्ष भेटघाट गरे । घरदैलोका क्रममा विकास, स्थायित्व र सुशासनका विषयमा आफ्ना योजनाहरू प्रस्तुत गर्दै आगामी निर्वाचनमा आफूलाई सहयोग गर्न आग्रह गरे ।

त्यसपछि ९ नम्बर वडाका विभिन्न स्थानका चिया पसलदेखि ग्रामथान, अर्नाखाडी प्रणामी मन्दिर परिसरमा भेटघाट र कोणसभालाई सम्बोधन गर्दै ओलीले स्थानीय जनताको चासो र सुझाव सुन्ने प्रयास गरे । दिउँसो २ बजे वडा–२ का देवीथान, बेलडाँगी र झोलुंगे पुल आसपासका बस्ती पुगेका ओलीले मतदातासँग झन्डै ५० मिनेट बिताए ।

स्थानीयसँग प्रत्यक्ष संवाद गर्दै उनले विगतमा सम्पन्न भएका विकास आयोजनाका बारेमा चर्चा गर्नुका साथै आगामी योजनाबारे जानकारी गराएका थिए । त्यसैगरी उनी वडा–८ स्थित ज्येष्ठ नागरिक सभाहल, बालुवाटारमा आयोजित कार्यक्रमलाई सम्बोधन गरेका थिए । उनले पार्टीका कार्यकर्तालाई एकताबद्ध भएर चुनावी अभियानमा सक्रिय हुन आह्वान गरे । साँझ वडा–६ मा पुगेर कार्यकर्ता तथा मतदातासँग समसामयिक राजनीतिक विषय, राष्ट्रिय मुद्दा तथा विकाससम्बन्धी आफ्ना दृष्टिकोण प्रस्तुत गरे ।

चार जिल्लाका चुनावी सभामा गगन

कांग्रेसका सभापति गगनकुमार थापाले आज शनिबार मधेश प्रदेशका चार जिल्लाका चुनावी सभामा सम्बोधन गरेका छन् । उनले सर्लाहीको लालबन्दी, रौतहट र बारा हुँदै पर्साको वीरगन्जमा पुगेर चुनावी सभालाई सम्बोधन गरेका हुन् ।

शनिबार साँझ रौतहटमा थापाले एमालेसँग मिलेर सरकार बनाउनु नै कांग्रेसको गल्ती भएको बताए । कांग्रेस क्षेत्र नं. ४ द्वारा बृन्दावन नगरपालिकाको हर्दियामा शनिबार आयोजित कार्यक्रममा बोल्दै सभापति थापाले ३२ सिटे माओवादीलाई प्रधानमन्त्री चाहिएको, २२ सिटे रास्वपालाई गृहमन्त्री चाहिएको भन्दै त्यसबेला धेरै त्रुटि भएको बताए । ‘कांग्रेस, एमाले, रास्वपा र माओवादी सबैले गल्ती गरेका छन्, कसैले फुर्ती नलगाए हुन्छ’, उनले भने, ‘अब फेरि पनि त्यस्ता गल्ती दोहोरिन दिनु हुन्न । विगतमा जे भयो अब म त्यतातिर जान चाहन्नँ, अबको पाँच वर्ष काम गरेर देखाउने हो ।’

सभापति थापाले जेन–जी आन्दोलनको भावना बुझ्नुपर्ने बताए । उनले मधेशमा शिक्षा, स्वास्थ्य, खानेपानी, सडक र दलित बस्तीको अवस्था दयनीय भएकाले आफ्नो सरकार बनेपछि यी सबै कुरा प्राथमिकतामा पर्ने बताए । थापाले आइतबार काठमाडौं उपत्यकामा हुने कार्यक्रमलाई सम्बोधन गर्ने बताइएको छ ।

कांग्रेसले आइतबार काठमाडौं उपत्यकामा ६ चुनावी सभा गर्ने

कांग्रेसले आइतबार काठमाडौं उपत्यकामा ६ वटा चुनावी सभा गर्ने भएको छ । चुनावी सभाहरूमा सभापति गगनकुमार थापा, उपसभापति विश्वप्रकाश शर्मा र प्रवक्ता देवराज चालिसेले सम्बोधन गर्ने भएका छन् । दिउँसो १ बजे काठमाडौं–१० को कीर्तिपुरमा हुने चुनावी सभामा सभापति थापा र प्रवक्ता चालिसेले सम्बोधन गर्नेछन् । यहाँ कांग्रेसले जिल्ला सदस्य हिमाल कार्कीलाई उम्मेदवार बनाएको छ । 

दिउँसो २ बजे भक्तपुरको ठिमीमा हुने सभामा उपसभापति शर्माले सम्बोधन गर्ने तालिका रहेको कांग्रेसको निर्वाचन प्रचारप्रसार समितिले जनाएको छ । भक्तपुर–२ मा कांग्रेसका उम्मेदवार कविर राणा छन् । कविर शर्मालाई उम्मेदवार बनाएको कांग्रेसले काठमाडौं–२ को पेप्सीकोला टाउन प्लानिङमा हुने सभामा पनि उपसभापति शर्माले सम्बोधन गर्नेछन् । प्रमोदहरि गुरागाइँ उम्मेदवार रहेको काठमाडौं–७ को बालाजु चोकमा दिउँसो ३ बजे हुने सभामा सभापति थापा र प्रवक्ता चालिसेले सम्बोधन गर्ने तालिका छ । 

दिउँसो ३ः३० बजे काठमाडौं–५ र ६ को संयुक्त चुनावी सभा सामाखुसी चोकमा हुनेछ । काठमाडौं–५ मा महामन्त्री प्रदीप पौडेल र काठमाडौं–६ मा जिल्ला सभापति सबुज बानियाँ उम्मेदवार छन् । 

संयुक्त सभालाई पार्टी सभापति थापा र प्रवक्ता चालिसेले सम्बोधन गर्नेछन् । दिउँसो ४ बजे काठमाडौं–४ को बालुवाखानीमा सभापति थापाले सम्बोधन गर्ने भएका छन् जहाँ कांग्रेसबाट सचिन तिमल्सेना उम्मेदवार छन् ।

आवेगमा होइन, सोचविचार गरेर मतदान गरौं : कांग्रेस उपसभापति शर्मा 

अछाम– कांग्रेसका उपसभापति विश्वप्रकाश शर्माले अछाम आएर विगतको राजनीतिक अस्थिरता र विकासको आवश्यकताबारे जोड दिएका छन् । शर्माले शनिबार अछामका दुवै प्रतिनिधिसभा निर्वाचन क्षेत्रका छुट्टाछुट्टै कार्यक्रमलाई सम्बोधन गरेका हुन् । उनले अछाम–१ र अछाम–२ मा आयोजित चुनावी सभामार्फत पार्टीका उम्मेदवारलाई जिताउन आह्वान गर्दै विकास, सुशासन र स्थायित्वको एजेन्डा अघि सारे । अछाम–१ मा कांग्रेसका तर्फबाट पूर्वजिल्ला सभापति भरतकुमार स्वाँर उम्मेदवार छन् भने अछाम–२ मा जिल्ला सभापति पुष्पबहादुर शाह मैदानमा छन् ।

‘अछाम आउँदा १२ वर्षअगाडि फेरी चढेर आएको थिएँ । ३४ वर्षमा ३० वटा सरकार बन्नु बेठीक भयो । कर्मचारीले काम गर्न पाएनन्,’ मतदातालाई संयमित हुन आग्रह गर्दै उनले भने, ‘मतदान गर्न जानुअघि सोचविचार गरौं, संयमित बनौं । देखाइदिनलाई आवेगमा, रिसमा मतदान गर्नु हुँदैन । राजनीतिमा पालो हुँदैन, प्रतिस्पर्धा हुन्छ ।’