काठमाडौँ — दुई वर्षअघिको एक भेटमा ‘नक्कली प्रचण्ड’ उपनामले चिनिएका हाँस्य कलाकार घनश्याम गौतमले भनेका थिए, ‘बाँचुन्जेलसम्म स–साना कुरामा खुसी हुनु नै मेरो लागी सौभाग्यको कुरा हो ?’

सधैं स–साना कुरामा खुशी खोजीहिँड्ने यिनै घनश्याम अब यो संसारमा छैनन् । कलाकारिता र नाट्य क्षेत्रमा आफ्नो परिचय बनाइरहेका उनीको ४३ वर्षको उमेरमा निधन भयो । परिवारका अनुसार दुई वर्षदेखि क्यान्सर रोगसँग जुधिरहेका उनले  सोमबार राति १२ बजेर ८ मिनेटमा भक्तपुर ताथलीस्थित काठमाडौं क्यान्सर अस्पतालमा अन्तिम श्वास फेरे । 

२०६४ सालको कुरा हो । पहिलो संविधानसभाको चुनावी रापताप थियो । नाटक लिएर दार्चुला पुगेका उनले प्रचण्ड उपनामले समेत चिनिने माओवादी केन्द्रका अध्यक्ष पुष्पकमल दाहालको अभिनय गरेका थिए । उनको यो अभिनय यति बेजोड भइदियो कि, त्यसपछि उनको सार्वजनिक परिचय नै बन्यो ‘नक्कली प्रचण्ड’ ।

चर्चित टेलीश्रृंखला 'मेरी बास्सै'देखि 'झ्याइँकुटी झ्याइँ'सम्ममा उनी ‘नक्कली प्रचण्ड’ कै भूमिकामा देखिएर थप लोकप्रिय भए । सडक नाटक, रेडियो नाटक र कचहरीमा सक्रिय गौतम विभिन्न स्कुलहरूमा पनि अभिनय सिकाउने गर्थे । गत भदौमा उनले बिरामीकै अवस्थामा तिजको गीत ‘मै अभागी चेली खुशी छैन बरिलै...’ बजारमा ल्याएका थिए । 

हरेक वर्ष हुने गाईजात्रा हाँस्य व्यंग्य कार्यक्रममा उनले अभिनयमार्फत धेरैलाई पेट मिची मिची हँसाए । २०८० गाईजात्राको नजिकिँदै गर्दा बिरामी परेपछि भने उनको अभिनय यात्रामा ब्रेक लाग्यो । 

०८० असारको कुरा हो । घनश्याम एक्कासी पेट दुख्ने समस्याले थलिए । सुरुमा त उनले दिसामा रगत देखिएकाले पायल्सको समस्या हो कि भनेर आर्युवेदिक उपचारमा लागे । समस्या बल्झिँदै गएपछि र थप उपचारमा जुटेपछि मात्रै उनले थाह पाए उनले आफूलाई ठूलो आन्द्रामा क्यान्सर भएको ।