१८ वर्षिया हटललाई घटनास्थलबाट उद्धार गरी नजिकैको ट्रमा सेन्टर पुर्याइए पनि चिकित्सकहरूले मृत घोषित गरेका थिए ।
What you should know
काठमाडौँ — ‘गडजिल्ला भर्सेज कङ’ फिल्मकी १८ वर्षीया अभिनेत्री काइली हटलको सवारी दुर्घटनामा परी निधन भएको छ । मंगलबार अमेरिकाको मेरिल्याण्डमा भएको सवारी दुर्घटनामा उनको मृत्यु भएको हो ।
‘मेरिल्याण्ड अफिस अफ द चीफ मेडिकल एक्जामिनर’का अनुसार हटलको मृत्यु दुर्घटनामा परी ‘अत्यधिक चोटपटक’ का कारण भएको पुष्टि भएको छ ।
स्थानीय समय अनुसार, मंगलबार बिहान ३ बजे आसपास मेरिल्याण्डको इजाम्सभिलमा दुर्घटना भएको थियो । १९ वर्षका युवकले चलाएको सन् १९९५ मोडलको होन्डा एकर्ड कार सडकको दायाँतर्फ मोडिएर छेवैको कल्भर्टमा ठोक्किएको थियो । प्रारम्भिक अनुसन्धानका अनुसार अत्यधिक गति नै दुर्घटनाको मुख्य कारक मानिएको छ ।
कारमा चालकसहित तीन जना सवार थिए । चालकलाई उपचारका लागि स्थानीय अस्पताल लगिएको छ भने उनको चोट गम्भीर छैन । अर्का एक यात्रुले भने घटनास्थलमै उपचार लिन अस्वीकार गरेका थिए ।
हटललाई घटनास्थलबाट उद्धार गरी नजिकैको ट्रमा सेन्टर पुर्याइए पनि चिकित्सकहरूले मृत घोषित गरेका थिए । घटनाबारे प्रहरीले थप अनुसन्धान गरिरहेको जनाएको छ ।
सांकेतिक भाषा प्रयोग गर्ने काइलीको सम्पूर्ण परिवार नै बहिरा समुदायको हो । उनका आमाबुबा जोसुआ र केत्सी हटलले सामाजिक सञ्जालमा सांकेतिक भाषामार्फत भिडियो पोस्ट गर्दै छोरीको निधनप्रति गहिरो शोक व्यक्त गरेका छन् ।
दुर्घटनापछि काइलीका बुबा जोसुआले सामाजिक सञ्जालमा सांकेतिक भाषामार्फत एक भावुक भिडियो सन्देश जारी गर्दै भनेका छन्, ‘हामीले सँगै बिताएका १८ वर्षप्रति म निकै आभारी छु, तर उनीसँग अझै धेरै समय बिताउन पाएको भए हुन्थ्यो । म काइलीको पार्थिव शरीर घर ल्याउन मेरिल्यान्ड जाँदैछु ।’
दुर्घटनास्थलबाट एयर एम्बुलेन्समार्फत अस्पताल पुर्याउनुअघि नै काइलीको मुटुको धड्कन रोकिसकेको पनि उनका बुबाले बताए । साथै, जोसुआले कार चालक १९ वर्षीय युवकलाई माफ गरिदिएको उल्लेख गर्दै भनेका छन्, ‘मैले तिमीलाई माफ गरिदिएँ । यो घटनालाई आफ्नो बाँकी जीवन बर्बाद गर्न नदेऊ ।’
काइली हटलको फिल्म यात्रा
श्रवणशक्ति नभएको परिवारमा जन्मिएकी काइलीले हलिउडमा बहिरा समुदायको प्रतिनिधित्व गर्दै छोटो समयमै ठूलो पहिचान बनाएकी थिइन् । उनले सन् २०२१ को चर्चित फिल्म ‘गडजिल्ला भर्सेज कङ’ र त्यसको सिक्वेल ‘गडजिल्ला एक्स कङ : द न्यू एम्पायर’ मा ‘जिया’ को भूमिका निर्वाह गरेकी थिइन् । फिल्ममा उनले ‘कङ’ सँग सांकेतिक भाषामार्फत संवाद गर्ने टुहुरी बालिकाको अभिनय गरेकी थिइन् ।
काइलीले टेलिभिजन सिरिज ‘म्याग्नम पीआई’ को एक भागमा पनि अभिनय गरेकी थिइन् भने आगामी थ्रिलर फिल्म ‘हृवाट डजन्ट किल अस’ मा पनि देखिने तय भएको थियो ।
सन् २०२४ मा ‘द एसोसिएटेड प्रेस’ लाई दिएको अन्तर्वार्तामा काइलीले फिल्ममा काम गर्नुअघि आफूले ‘मोन्स्टर’ फिल्महरू नहेरेको र बुबाले नै त्यस क्षेत्रबारे बुझ्न मद्दत गरेको बताएकी थिइन् । उनले भनेकी थिइन्, ‘म धेरै मानिसहरूलाई प्रेरणाको स्रोत मान्छु, तर मेरा लागि सबैभन्दा ठूला प्रेरणाका स्रोत मेरा आमाबुबा र दिदीबहिनीहरू हुन् ।’
