लस एन्जलस — मादक पदार्थ सेवन गरी गाडी चलाएको आरोपमा गत महिना पक्राउ परेकी पप गायिका ब्रिट्नी स्पेयर्सविरुद्ध बिहीबार क्यालिफोर्नियामा फौजदारी अभियोगको अभियोजन पत्र दायर गरिएको छ ।

भेन्चुरा काउन्टीस्थित जिल्ला न्यायाधिवक्ताको कार्यालयले ब्रिट्नीविरुद्ध उक्त मुद्दा दर्ता गराएको हो । उनलाई गत ४ मार्चमा दक्षिणी क्यालिफोर्नियास्थित राजमार्गमा उच्च गतिमा अनियन्त्रित रूपमा आफ्नो बीएमडब्ल्यू चलाएपछि प्रहरीले नियन्त्रणमा लिएका थिए । तर गायिकाका प्रतिनिधिले भने उक्त घटनालाई ‘पूर्णत: अक्षम्य’ बताएका थिए । घटनापछि ४४ वर्षिया गायिकाले पटक पटक रिहाब सेन्टर लगिएकी थिइन् । 

यस घटनाको पेशी आगामी सोमबारका लागि तोकिएको भए पनि सामान्य अभियोग भएकाले गायिका स्वयं भने अदालतमा उपस्थिति हुनु पर्ने छैन । ‘तर ब्रिट्नी सुनुवाइमा उपस्थित हुने वा नहुने भन्ने बारेमा उनी र उनका वकिलबीचको आपसी सल्लाहमा तय हुनेछ,’ न्यायाधिवक्ताको कार्यालयले भनेको छ ।  

अभियोजन दर्ता गर्ने सरकारी वकिलको कार्यालयले भने उक्त घटना कुनै दुर्घटना वा हताहती नभएकोले गायिका दोषी नै पाइएको खण्डमा पनि जेल सजाय भने नहुने बताएको छ । अभियोजनकर्ताले पनि गायिकाले मादकपदार्थ वा लागूपदार्थ सेवन गरी गाडी चलाएकोमा गल्ती स्वीकार गरेमा कमभन्दा कम सजायका लागि छुट दिन सक्ने बताएका छन् । ब्रिट्नीलाई यस्तो विकल्पको मौका दिइन सक्ने जिल्ला वकिलको कार्यालयका जोए बुट्टिटाले बताए । यस्ता घटनामा प्रायः दोषीलाई एक वर्षको लागि परीक्षणकालमा राखिनुका साथै मादकपदार्थ सेवन गरी सवारी चलाउनेका लागि दिइने कक्षा लिन र जरिवाना पनि तिराइन्छ ।

ब्रिट्नीका प्रतिनिधिले भने उनले सही कदम चाल्ने र कानुनको पालना गर्नेमा आशावादी छन् । ‘र, यो नै गायिकाका लागि लामो समयदेखि चाहिएको जीवनमा परिवर्तनको पहिलो सही कदम पनि हुनेछ,’ ब्रिट्नीका आफन्तले भनेका छन्, ‘उनको यो कठिन समयमा सबैले साथ र सहयोग पनि दिनेछन् ।’