काठमाडौँ — दीपक रौनियार निर्देशित ‘राजागंज: पूजा सर’ले नेपाल अन्तर्राष्ट्रिय चलचित्र महोत्सव (निफ) मा  सर्वोत्कृष्ट  अन्तर्राष्ट्रिय चलचित्रको अवार्ड जितेको छ । फिल्मले ट्रफीसहित १५ सय अमेरिकी डलर पुरस्कार जितेको छ । रौनियारको अनुपस्थितिमा यो अवार्ड निर्देशक गणेशदेव पाण्डेले उचाले । 

सोमबार काठमाडौंको सुन्धारास्थित सिभिल मलमा वितरण गरिएको अवार्डमा ‘गुन्युचोलो : द ड्रेस’को वर्चश्व रह्‍यो । समुन्द्र भट्ट निर्देशित यो फिल्मले सर्वोत्कृष्ट राष्ट्रिय चलचित्र पुरस्कार पायो  । निर्माण टिमले सम्मानमा एक हजार अमेरिकी डलर जित्यो । अवार्ड उचाल्न निर्देशक भट्टसहित निर्माण टोली नै मञ्चमा उक्लेको थियो । यही फिल्मबाट उत्कृष्ट निर्देशकको अवार्ड, निर्देशक भट्टले जितिन् । यही फिल्मबाट नाजिर हुसेन सर्वोत्कृष्ट अभिनेता घोषित भएका छन् । अभिनेत्रीतर्फ भने ‘कोशेढुङ्गा’बाट सुरक्षा पन्तले अवार्ड उचालिन् । 

‘केटी हराएको सूचना’बाट दीपेन्द्र गौचन राष्ट्रियतर्फ सर्वोत्कृष्ट पटकथाकारको अवार्ड जित्दा सर्वोत्कृष्ट सिनेमेटोग्राफरको अवार्ड ‘कोशेढुङ्गा’बाटै बाबु श्रेष्ठले जिते । 

दक्षिण एसियाली विधातर्फको प्रतिस्पर्धामा नेपाली भाषाको भारतीय फिल्म ‘जार’ सर्वोत्कृष्ट घोषित भयो । फुर्वा छिरिङ लामा निर्देशित यस फिल्मले ट्रफी र पाँच सय अमेरिकी डलर प्राप्त गर्‍यो । सर्वोत्कृष्ट अन्तर्राष्ट्रिय डकुमेन्ट्रीको अवार्ड आइसल्यान्डको ‘ग्राउन्ड बिनिथ आवर फिट’ले पाउँदा सर्वोत्कृष्ट अन्तर्राष्ट्रिय लघु फिल्मको अवार्ड ’सिप’ले पायो । त्यस्तै, सर्वोत्कृष्ट एआई थिम्ड लघु फिल्मको अवार्ड ‘स्पिरिट अफ द माउन्टेन’ले पायो । फिल्मले ट्रफीसँगै ५ सय अमेरिकी डलर प्राप्त गर्‍यो । यो पाङ जिया निर्देशित यो फिल्म चिनिया लघु फिल्म हो । 

त्यस्तै, सर्वोत्कृष्ट विद्यार्थी चलचित्रको अवार्ड मेक्सिकोको चलचित्र ‘पासारिन्हो’ले जित्यो । यो फिल्मले अवार्डमा ५ सय डलर र ट्रफी प्राप्त गर्‍यो । सर्वोत्कृष्ट राष्ट्रिय डकुमेन्ट्रीतर्फ दीपक छोदेन लामाको ‘होम इज नट अ प्लेस’ले अवार्ड पाउँदा सर्वोत्कृष्ट राष्ट्रिय लघु फिल्म सुरज पौडेलको ‘रिहाना’ घोषित भयो । यी दुई फिल्मले ट्रफीसहित ५० हजार रुपैयाँ प्राप्त गर्‍यो ।