विराटनगर — गायक तथा अभिनेता प्रशान्त तामाङको पार्थिव शरीर सोमबार जन्मस्थल दार्जिलिङ लगिएपछि उनलाई अन्तिम श्रद्धान्जलीका लागि राजनीतिकर्मीदेखि शुभेच्छुकहरूको भीड लागेको छ । उनको पार्थिव शरीरलाई अहिले अन्तिम श्रद्धान्जलीका लागि दार्जिलिङको सूचना तथा संस्कृति विभागमा राखिएको छ ।

वागडोग्रा विमानस्थलमा प्रशान्त तामाङको पार्थिव शरीर आइपुगेपछि सुरु भएको अन्त्येष्टि यात्रामा सहभागी हुन दार्जिलिङका लोकसभा सांसद राजु विष्ट लगायतका नेता तथा संगीतकर्मी दार्जिलिङ पुगेका छन् । 

तामाङलाई ‘गोर्खा युवाको प्रतीक’का रूपमा स्मरण गर्दै सांसद विष्टले उनको सुमधुर स्वर, नम्रता र सरलताले विश्वभरका श्रोताको मन जितेको बताए । दार्जिलिङका पहाडबाट उदाएर प्रशान्तले गोर्खा समुदायका आशा र आकांक्षालाई विश्व मञ्चसम्म पुर्‍याएको र यस क्षेत्रका लागि अपार गौरवको विषय बनेको उनको भनाइ थियो । _{तस्बिरहरू : सिक्किम मेसेन्जर}