काठमाडौँ — माघ १ गते नेपालभर प्रदर्शन हुँदै छ फिल्म ‘भाइरल गोर्खे’ । यसको विषय सामाजिक सञ्जालसँग केन्द्रित छ ।

अभिनेता सौगात मल्लले सामाजिक सञ्जालको बढ्दो दबदबाबीच विश्वभर ‘भाइरल’ बन्ने ध्याउन्नमा रहेकालाई चलचित्रले मनोरञ्जनसँगै सन्देश पनि दिने बताएका छन् ।

'चलचित्रको विषयवस्तु केवल ‘टिकटक’सँग जोडिएको भए सायद म अभिनय गर्थिन होला, तर त्यहाँ समाज र परिवेश जोडिएको छ । एउटा सामान्य व्यक्तिको भाइरल हुने लालस र त्यसले निम्त्याउने आरोहअवरोह चलचित्रमा समेटिएको छ,' उनले भने, 'भाइरल हुन जति मेहनत गर्नुपर्छ, त्यति नै त्यहाँ टिकिरहन मेहनत गर्नुपर्छ । विद्यमान परिवेशमा दर्शकलाई आकर्षित गर्न चलचित्र सफल हुनेछ ।'

‘भाइरल गोर्खे’ को पटकथा पढेपछि मनोरञ्जन प्रदान गर्ने समयसान्दर्भिक विषयवस्तु समेटिएको पाएर नै प्रस्ताव स्वीकार गरी फिल्ममा जोडिएको उनले बताउनुभयो ।